لیکنه: مدثر دعوت
افغانستان خپله لومړنۍ ټيسټ لوبه د جون په ۱۴ نيټه د پنجشنبې په ورځ د هندوستان سره په بنګلور کې پيلوي.
له اوس څخه ددې لوبې پيل ته د ساعتونو انتظار پاتې دی.
افغانستان څو ورځې وړاندې د شل اوريزو لوبو په لړۍ کې بنګلديش ته په ۳-۰ ماتې ورکړه، خو ټيسټ د شل اوريزو لوبو سره ډير توپير لري.
هندوستان هم د افغانستان په وړاندې د ټيسټ لوبې لپاره پوره تياری نيولی، هر کله يې د لوبغاړو په سکواډ کې تغير راځي، لکه د ساها پرځای د تجربه لرونکې دنيش کارتيک راوستل او په دې وروستيو کي يې غوره سپينر توپ اچوونکی چاهال هم په تمريناتي کمپ کې له ځان سره اخيستی.
د هندوستان ترټولو ډيره ويره د افغانستان د سپينر توپ اچوونکو راشدخان، محمدنبي او مجيب الرحمن څخه ده، خو په توپوهنه کي يې رحمت شاه هم له پامه نه دی غورځولی.
د افغانستان کرکټ ملي لوبډله اوسمهال بنګلور ته رسيدلې او د ټيسټ لپاره د تياري په موخه يې تمرينات پيل کړي.
د ټيسټ کرکټ په تاريخ کې يوازینۍ لوبډله اسټراليا ده چې خپله لومړنۍ ټيسټ لوبه يې ګټلې، ګورو چې افغانستان به د اسټراليا دغه ريکارډ مات کړي اوکه يا؟
ايا تر اوسه خبر واست چې د ټيسټ هيوادونو خپلي لومړنۍ لوبې کله او د چا په وړاندې پيل کړي، ګټلي يې دي که بايللي؟
ددې او نورو پوښتنو ځواب په دې ليکنه کې پيدا کولای شئ:
۱ـ اسټراليا او انګليستان
د ټيسټ لومړنۍ لوبه په ۱۸۷۷ز کال کې د اسټراليا او انګليستان ترمنځ ترسره شوه.
اسټراليا هماغه لوبه د ۴۵ منډو په توپير وګټل.
اسټرالياوی چارليس بنرمين لومړنی لوبغاړی شو چې په ټيسټ کي يې سليزه ترسره کړه، نوموړي په هماغه لوبه کې ۱۶۵ منډي وکړې، خو د زخمونو له کبله د ميلبورن له لوبغالي بهر ووت.
بيلي ميډوينټر لومړنی لوبغاړی شو چې پنځه ویکټې يې د ۷۸ منډو په ورکولو سره ترلاسه کړې.
د کرکټ د تاريخ لومړنۍ لوبې بريا د اسټراليا په نوم ثبت شوه.
۲ـ ويسټ انډيز
ويسټ انډيز په ۱۹۲۸ز کال کې خپله لومړنۍ ټيسټ لوبه په لارډز لوبغالي کې د انګليستان په وړاندي ترسره کړه.
انګلينډ هماغه لوبه د يوې پاړۍ او ۵۸ منډو په توپير وګټل.
انګلينډي ايرنيسټ ټيلډيسلي، په هماغه لوبه کې ۱۲۲ منډي وکړې، د مخه تردې چي لوبډله يې ۴۰۱ منډو کې وسوځيږي.
ويسټ انډيز ۱۷۷ او ۱۶۶ منډې ترسره کړې.
۳ـ سويلي افريقا
په پورټ الزابيټ لوبغالي کې سويلي افريقا خپله لومړنۍ لوبه د انګليستان په وړاندي په ۱۸۸۹ز کال کې ترسره کړه.
ډونيل په لومړنۍ ټيسټ کې د سويلي افريقا لوبډلمشر وو، خو روز بيا د سويلي افريقا لومړنی توپ اچوونکی وو، چې په ټيسټ کي يې ۵ لوبغاړي وسوځول.
انګليستان نيوزلينډ ته په ۸ ویکټو ماته ورکړه.
۴ـ نيوزلينډ
نيوزلينډ خپله لومړنۍ ټيسټ لوبه په ۱۹۳۰ز کال کې د انګليستان په وړاندط ترسره کړه.
ټام لاوري په ټيسټ کې د نيوزلينډ لومړنی لوبډلمشر وو، نيوزلينډي روګربلونټ د لوبې تر ټولو ډيرې ۴۵ ناسوځيدلې منډې ترسره کړې.
هماغه لوبه انګليستان په ۸ ویکټو له نيوزلينډ څخه وګټل.
۵ـ هندوستان
هندوستان خپله لومړنۍ ټيسټ لوبه په ۱۹۳۲ز کال کې د لارډز په لوبغالي کې د انګليستان په وړاندي ترسره کړه.
هماغه لوبه انګليستان د ۱۵۸ منډو په توپير وګټله.
نايودو، د هندوستان په لومړني ټيسټ لوبه کې لوبډلمشر وو، محمدناصر د هندوستان لومړنی توپ اچوونکی وو، چې پنځه ویکټې يې ترلاسه کړې.
۶ـ پاکستان
پاکستان خپله لومړنۍ ټيسټ لوبه د ډهلي په ښار کې د هندوستان په وړاندې په ۱۹۵۲ز کال کې ترسره کړه.
محمدحنيف لومړنی پاکستانی لوبغاړی وو چې په ټيسټ کي يې د خپل هيواد لپاره نیمه سليزه ترسره کړه.
په هماغه لوبه کې د پاکستان لوبډلمشر عبدالقادر وو.
هندوستاني وينو منکاډ، په دې لوبه کې د پاکستان ۱۳ لوبغاړي وسوځول.
هندوستان هماغه لوبه په يوې پاړۍ او ۷۰ منډو وګټله.
۷ـ سريلانکا
سريلانکا د اتم ټيسټ هيواد په حيث په ۱۹۸۲ز کال کې د کولمبو په ښار کې خپله لومړنۍ ټيسټ لوبه د انګليستان په وړاندي ترسره کړه.
انګليستان لوبه د سريلانکا څخه په ۷ وکټو وګټله.
بنډولا وارناپورا د سريلانکا لوبډلمشر وو.
د سريلانکا توپوهونکو، مډوګالا،ارجونا راناټونګا او ډياس که څخه هم نيمه سليزي ووهلې خو لومړنۍ ټيسټ لوبه يې بايلول.
۸ـ زيمبابوې
زیمبابوې په ۱۹۹۲ز کال کې دهندوستان سره په هراري لوبغالي کي خپله لومړنۍ ټيسټ لوبه ترسره کړه.
هماغه لوبه بې پايلي اعلان شوه، خو د زيمبابوې لوبډلمشر ډاو هوغټن په ۱۲۱ توپونو ۴۱ ناسوځيدلي منډي وکړې.
۹ـ بنګلديش
بنګلديش خپله لومړنۍ ټيسټ لوبه په ۲۰۰۰ز کال کې د ډاکې په لوبغالي کي د هندوستان په وړاندي ترسره کړه.
په دې ټيسټ لوبه کې د بنګلديش لوبډلمشر نیامرالرحمن وو، خو امين الاسلام بیا لومړنی بنګلديشی وو چې په ټيسټ کي يې سليزه ووهله، ده ۱۴۵ منډي وکړې، خو بيا هم هندوستان لوبه په ۹ ویکټو وګټله.
۱۰ـ ايرلينډ
ايرلينډ اخرنۍ لوبډله ده چې تر افغانستان مخکې يې خپله ټيسټ لوبه ترسره کړه.
ايرلينډ د پاکستان په وړاندې خورا ښه لوبه ترسره کړه، خو بيا يې هم لوبه په ۸ ویکټو بايلوله.
ايرلينډي کيوين اوبراين په دويمه پاړۍ کې ۱۱۸ منډې ترسره کړې.
پاکستان په دويمه پاړۍ کې هغه مهال چې ۱۴ منډي يې کړې وې ۳ لوبغاړي يې سوځيدلي وه، خو د ۱۶۰ منډو هدف ته يې د پنځو لوبغاړو په سوځيدو سره ځان ورساوه.