سمیع الله درانی
د انګلستان په کوربتوب له اسټرالیا سره د تاریخي ټېسټ لوبو اشېز سیریز پنځمه لوبه روانه ده، دا لوبه د سپټمبر په ۱۲ مه نېټه د پنجشنبې په ورځ د انګلستان په کېننګټن اوول لوبغالي کې پیل شوه.
انګلستان په لومړۍ پاڼۍ توپ وهنه کې د ټولو وېکټو په اوټ کېدو سره ۲۹۴ منډې وکړې؛ دې لوبه کې جاس بټلر ۷۰ او جو روټ ۵۷ منډې وکړې.
مېچل مارش پنځه او پټ کمېنس ۳ وېکټې واخېستې.
اسټرالیا په لومړۍ پاڼۍ توپ وهنه کې د چټک توپ اچوونکي جوفرا ارچر له خوا په دام کې ولوېده، هغه د ډېوېډ وارنر په ګډون د اسټرالیا شپږ لوبغاړي وسوځول.
اسټرالیا ۲۲۵ منډې وکړې، چې سمېت پکې ۸۰ منډې جوړې کړې.
له ارچر سره څنګ کې سام کورن هم درې وېکټې واخېستې.
اوس د انګلستان دوهمه پاڼۍ روانه ده، چې ۹ منډې یې دي او کوم لوبغاړی یې نه دی سوځېدلی.
د روان سیریز دوه لوبې اسټرالیا ګټلي، یوه مساوي شوې او یوه انګلستان ګټلې، پنځمه هغه یې دوام لري.
د اشېز ټېسټ سیالیو تاریخچه
دا سیالۍ له ۱۸۸۲ م کال راهیسې د اسټرالیا او انګلستان ترمنځ کېږي، هر کال پنځه لوبې کېږي، چې یو کال په اسټرالیا او بل کال په انګلستان کې تنظمېږي.
تر اوسه پورې ۷۰ سیریزونه شوي دي، چې دې سیریزونوکې ۳۳۰ لوبې ترسره شوي دي، چې ۱۳۴ اسټرالیا او ۱۰۶ انګلستان ګټلي دي.
د دواړو لوبډلو ترمنځ ۹۰ لوبې مساوي شوي دي.
په اویا سیریزونوکې ۳۳ اسټرالیا او ۳۲ انګلستان ګټلي دي او ۵ سیریزونه مساوي شوي دي.
