د محمدنبي عیسی خېل زوی حسن نبي عیسی خېل وایي، لومړی مې له پلار څخه لارښوونې اورم، بیا د خپل پلار لار تعقیبوم.
حسن نبي عیسی خېل په دوبۍ کې لوبېږي او د شارجه بُخاطر په نامه لوبډله کې اخیستل شوی دی.
هلته د کلبونو ترمنځ لوبې روانې دي.
حسن نبي عیسی خېل په یوه لوبه کې په ۳۰ توبونو ۷۱ منډې وکړې.
تېره ورځ د می په ۲۸ مه د جمعې په ورځ هغه سلیزه وهلې ده.
دا لومړی ځل دی، چې هغه د سیمې په کچه لوبو کې اخیستل کېږي او لوبې کوي.
محمدنبي عیسی خېل د افغانستان په کرکټ کې یوه وتلې څېره ده او همدارنګه د نړۍ په کچه شل اوریزو لیګونو کې لوبېږي.
اوس یې زوی حسن نبي عیسی خېل په توپوهنه کې خورا ښه ځلېږي او د بُخاطر په نامه لوبډله کې یې رول مهم دی.
په ۳۰ توپونو ۷۰ منډې یې خورا چټکې وې، چې ۷ یې پکې شپږیزې هم وهلې وې.
حسن نبي عیسی خېل ویلي له کرکټ سره هغه وخت زیاته مینه پېدا شوه، کله یې چې خپل پلار د افغانستان په لباس کې په تلویزیون ولید او د افغانستان لپاره لوبېده.
هغه رسنیو ته ویلي چې هېڅ فشار یا پرېشر نه مني، د خپل پلار قدمونه تعقیبوم او غواړم چې د افغانستان لپاره ولوبېږم.
نوموړی زیاتوي، یواځې د خپل پلار کوچېنګ یا روزونه باندې ډېر باور لري.
د کرېک ټرېکر وېب پاڼې لیکلي دي، چې حسن نبي اوس په شارجه کې په یوه اکاډمي کې تمرینات او مسلکي کرکټ کوي او د خپل پلار روزنې ته سترګې په لار دی.
همدارنګه هغه اوس د عربي متحده اماراتو د لوبغاړي کاشف داود تر روزنې لاندې دی او په شارجه کې ترې روزنه ترلاسه کوي.
خپل کاشف داود چې د حسن نبي روزونکی دی، ویلي دي چې هغه یو له وړتیاوو ډک لوبغاړی دی او راتلونکی یې خورا روښانه دی.
د کاشف وېنا ده چې حسن نبي عیسی خېل فطري وړتیا لري، توپ وهنه او ډګر ساتنه یې خورا په زړه پورې ده.