د اسد ۲۸ مه نیټه، چې د افغانستان د خپلواکۍ د ورځې سره برابره ده، هر کال په ټول هېواد کې په خوښیو سره لمانځل کیږي.
سږ کال هم د نورو ولایتونو په څیر د ننګرهار ولایت په مرکز جلال اباد ښار کې د دغې ورځې د جشن لمانځلو په موخه پوره تیاری روان دی.
ننګرهار ولایت په دې وروستیو کې د جګړې په لمړۍ کرښه بدل شوی دی او د څو ورځې وړاندې د مسلسل پیښو رامنځ ته کیدو سره پکې ژوند ستونزمن او د ډار نه ډک شو.
په مختلفو ادارو بریدونه ترسره شول او پکې زیات شمیر خلکو ته مرګ ژوبله واوښته، چې له کبله یې یو شمیر خلکو د کابل پر لورې کډه وکړه، پاتې میشتو ته روزګار له ویرې او ډار نه خالی نه و.
خو په دې وروستیو کې په جلال اباد ښار د ملي اردو او ځانګړو ځواکو ته له سپارلو سره وضعیت ښه شوی ښکاري.
اوسمهال ښار د درې رنګه بیرغ په رنګینو او رڼا ګانو ښکلی شوی، خلک یو ځل بیا را بیداره شوي دي او د هېواد د خپلواکۍ جشن لمانځلو ته یې تیاری روان لا هم روان دی.
د جلال اباد ښار ټول واټونه په درې رنګه بیرغ، رڼاګانو او لوحو سره رنګین شوی دی، چې د ښآر ښکلا ته یې ځانګړی خوند ورکړی دی.
ښايي له دې کړنې موخه دا وي، چې د څو ورځو وړاندې د وحشت نه ډک ننګرهار یو ځل بیا خلکو ته د ارامۍ فضاء کې د ژوند کولو انځورول وي.
هره ورځ ډلې ډلې ځوانان سر له اوس نه واټونو ته راوځي، زیاتو ځوانانو په خپل سر د بیرغ نه جوړه خولۍ، په مخ نښان له ځان څخه بیرغي شمله تاوه کړې، موټرې، ریکشې او بایسکلې یې رنګین کړې وي، چې د یو ملي احساس ښکاروندي ده.
نږدې ۹۹ کال وړاندې په ۱۲۹۸هجري لمریز کالکې غازي امان الله خان د انګریزانو څخه خپلواکي واخیسته او دغه هېواد د یو خپلواکه او مستقل دولت په توګه په نړۍ کې وپیژندل شو، چې اوس هر کال یې کلیزې په بېلابیلو مراسمو سره لمانځل کیږي.
