د ملګرو ملتونو امنیت شورا تېره ورځ د رایو په اکثریت د ملګرو ملتونو د فوق العاده غونډې رابلل تایید کړل.
په دې غونډه کې به د ملګرو ملتونو ټول غړي هېوادونه ګډون کوي او د روسیې د اقدام په اړه د نظر څرګندولو حق لري.
روسیې هڅه وکړه چې ددغه غونډې د رابللو مخه ونیسي خو بریالي نه شول.
له دې سره جوخت په بلاروس کې د اوکراین او روسیې مذاکرات پيل شوي دي.
پوتین بیا د اروپايي هېوادونو او ناټو د ګواښونو په ځواب کې اټومي پوځ ته دتیارسی امر کړی دی.
پوتین ویلي د هېچا مداخله نه مني او د هر ډول مداخلې په صورت کې به سخت ځواب ورکړي.
په ورته وخت کې روسیې ویلي چې له اوکراین سره د وروستي کړکېچ د حل په موخه یې یو پلاوی بلاروس ته رسېدلی دی.
د کرملین ویاند دیمیتري پسکوف ویلي چې دوی له اوکراین سره د ستونزو د حل په موخه یو مذاکراتي پلاوی ټاکلی دی او یاد پلاوی بلاروس ته رسېدلی هم دی.
سپوټنیک اژانس راپور ورکړی دی چې په دې مرکچي پلاوي کې د روسیې د بهرنیو چارو وزارت، دفاع وزارت او د کرملین ماڼۍ استازي برخه لري.
د یادونې ده چې پرون اوکراین د روسیې د اوربند وړاندیز ومنل او د خبرو له لارې یې د مسائلو پر حل ټینګار وکړ.
