اقتصاد ټولنیز ژوند ژوند بڼه سرسکالو کلتور او هنر مخکښان

د افغانستان د زعفرانو بابا ومړ؛ غني یې مړینه ستره ضایعه بللې

راپور: نسیمه محمدي

د افغانستان د کرنې او مالدارۍ وزارت سه شنبه د سپټمبر ۱۵مه تايید کړه، چې محمد اکبر مشهور په «د زعفرانو بابا» د مغزي سکتې ناروغۍ له امله ومړ، ولسمشر محمد اشرف غني یې مړینه ستره ضایعه بللې ده.

محمد اکبر له لومړنیو کسانو څخه و، چې په هرات ولایت کې یې د زعفرانو کښت رواج کړ. نوموړی د افغانستان د مخکښو بزګرانو څخه ګڼل کېږي، چې د زعفرانو بوټي په تولید او کښت کې ګام پورته کړ.

د افغانستان ولسمشرۍ ماڼۍ او د هرات ولایت د کرنې ادارې، د حاجي محمد اکبر مړینه یوه «ضایعه وګڼله.» نوموړی تېره شپه (دوشنبه د سنبلې ۲۴) په هرات کې ومړ.

اوسمهال د زعفرانو په تولید کې د هرات ولایت، لومړی مقام لري او د دغه ولایت تولید شوي زعفران ښه نړیوال پېرېدونکي لري.

ارګ د یوه پیغام په خپرولو سره لیکلي، چې حاجي محمد اکبر د خپل عمر ۲۵ کاله د زعفرانو په کښت او ترویج کې تېر کړل او ویې کولای شول، د افغانستان زعفران په ملي او نړیواله سطحه مشهور او وځلوي.”

په پیغام پاڼه کې راغلي چې هغه د افغانستان د زعفرانو کارکوونکو لپاره بېساري خدمتونه ترسره کړل او په دې برخه کې یې د دوی د ملاتړ څخه هېڅ ډول مرستې ونه سپمولې.

عبدالصبور رحماني د هران ولایت د کرنې رییس بي.بي.سي ته وویل، چې حاجي محمد اکبر هغه وخت د زعفرانو کښت ته مخ کړه، چې دا بوټی د افغانستان بزګرانو ته نا آشنا او د خرڅلاو بازار نه درلود.

هغه وویل، که څه هم نورو بزګرانو د زعفرانو په ترویج کې رول درلود، خو د “حاجي محمد اکبر” ونډه، د دغه محصول په پراختیا کې د پام وړ وه.

د ښاغلي رحماني په وینا د نوموړي هڅې لامل شوې، چې پخواني ولسمشر حامد کرزي، دغه بزګر ته د وزیر محمد اکبر خان مډال او د «زعفرانو د بابا» لقب ورکړ.

ښاغلي صبور وویل تېر کال هرات ولایت د زعفرانو ۱۷ ټُنه تولید سره، په هېواد کې لومړی مقام درلود او د ارزونو پر اساس، تمه کېږي چې په روان کال کې هم، د ۲۰ټُنه شاوخوا زعفران تولید شي.

د زعفرانو بابا د دغه بوټي کښت په ۱۳۷۲ ه.ل کال د هرات ولایت په پشتون زرغون کې پیل کړ.

17266581_304.jpg

د لیکوال/ لیکوالې په اړه

نسیمه محمدي ، کابل

نسیمه محمدي، لېکواله، ژباړنه او د روغتیايي برخې محصله ده. نوموړې یاران ته په بیلابیلو مسالو په ځانګړې توګه روغتیا سره په تړلو موضوعګانو لیکنې، ژباړې او مطالب چمتو کوي. په یاران کې د نسیمې د خپرو شویو لیکنو د بیا خپراوي حق له یاران ادارې سره خوندي دی.

تبصره مو ولیکئ