افغانستان اقتصاد سرسکالو

پکتیا: د ځنګلونو ساتنې، بیارغونې او پراختیا په پار قومي تړونونه لاسلیک شول

لیکنه: بشر درویش
راپور: بشر درویش

د کرنې اوبولګولو او مالدارۍ وزارت له خوا د پکتیا ولایت د ځنګلو او طبیعي سرچینو د ساتنې، بیا رغونې او  پراختیا په پار قومي تړونونه لاسلیک شول.

د افغانستان د کرنې وزارت یوه خبرپاڼه کې ویل؛ي شوي تړونه د پکتیا ولایت د سیمه ییزو چارواکو، قومي مشرانو او ځوانانو په شتون کې د یو لړ مراسمو په ترڅ کې لاسلیک او هر اړخیزې خبرې پرې وشوې.

دغه تړونونه د پکتیا مرستیال والي عبدالولي سهي او د یاد ولایت د یوشمېر نورو چارواکو په شتون کې د کرنې وزارت د طبیعي سرچینو مشر محمدرفیع قاضي زاده، د کرنې وزارت د ځنګلونو رییس محمد امان یار له خوا ددې ولایت له یوشمېر قومي مشرانو او ځوانانو سره لاسلیک شول.

د تړونونو موخې

ددغو تړونونو پر بنسټ به په یاد ولایت کې د ځنګلونو د پرېکېدو مخه نیول کیږي او ترڅنګ یې د ځنګلونو د ساتنې، بیارغونې او پراختیا په پار هلې ځلې کیږي.

یاد تړونونه به په لومړیو کې د پکتیا د مرکز په ګډون په ۷ ولسوالیو کې د قومي مشرانو په همکارۍ پلي کیږي، چې له مخې به یې د ځنګولونو د خودنیتابه، بیارغونه او پراختیا په برخه کې هڅې لا ګړندی شي.

په دې اړه جوړه شوې غونډې ته د کرنې اوبولګولو او مالدارۍ وزارت د طبیعي سرچینو رییس محمد رفیع قاضي زاده د ځنګلونو په برخه کې د ولسونو په همکارۍ او د شویو تړونو پر اهمیت هر اړخېزې خبرې وکړې.

ښاغلی قاضي زاده ځنګولونه د ټول ولس عامه شتمني وبلله او زیاته یې کړه:

«ددغو تړونونو پر بنسټ به په دې ولایت کې د ځنګلونو پرېکول بند او د ځنګلونو ساتنې او پرختیا ته لا ډېر کار ووشي او دا لړۍ به نورو ولایتونو ته هم وغځیږي. هغه وویل انډولیز پراختیا ته په پام سره ددې ولایت پاتې ولسوالۍ به هم ددې تړونونو ترچتر لاندې راشي.»

په ورته وخت کې د پکتیا مرستیال والي عبدالولي سهي د پکتیا ولایت له ولسونو وغوښت، چې د ځنګلونو په ساتنه کې دې خپل مسوولیت ادا او دې برخې ته دې لا پاملرنه وکړي، هغه د پکتیا پر ولسونو غږ وکړ چې د بشر دا ستر امانت دې لا ښه وساتي.

د یاد وزارت خبرپاڼه کې ویل شوي؛ دغه راز د ټولنې پر اهمیت، د ځنګلونو په ګتو او د لا زیاتېدو په پار د کرنې وزارت د ځنګلونو رییس محمد امان امان یار له لوري ګډونوالو ته روزنیز پروګرام وړاندې شو، تر څو ولسونه پوه شي، چې څنګه په ټولنه کې د خپلو سیمو ځنګلونه ښه ساتنه وکړي.

قومي مشرانو د شویو توړونو په پلي کولو او یادو شویو مادو ته په پوره ژمنتیا سره ډاډ وښود او په دې برخه کې یې د هر راز همکارۍ ژمنه وکړه.

رسمي جوازونه

یاد وزارت ویلي؛ په همدې حال کې د ځنګلونو د قانون پر اساس په دې ولایت کې د ځنګلونو د بیارغونې، ساتنې او پراختیا په پار په بېلابېلو ولسوالیو کې ۵۲ مدیریتي ټولنو ته د کرنې وزارت له خوا په رسمې توګه د فعالیت جواز لیکونه ورکړل شول، چې پربنست به یې په دې ولایت کې د نویو کورنیو قوریو د روزنې او څارنې ترڅنګ ددې ولایت د ځنګلونو د ساتنې، بیارغونې او پراختیا په برخه کې فعالیت کوي.

د لیکوال/ لیکوالې په اړه

بشر درویش

بشر درویش د یاران د کاري ټیم غړی دی، چې پر بیلابیلو مسلو د یاران لپاره راپورونه او مطالب چمتو کوي

تبصره مو ولیکئ