سفر له نړۍ

د نړۍ له مشهورو میدانونو سره اشنا شئ!

لیکنه: صادق طارق

تاسې به پخپلو سیمو کې حتماً داسې میدانونه لیدلي وي، چې له پخوا راهیسې خلکو د را ټولیدنو، مړي ـ ژوندي او نورو مناسبتونو لپاره په مختلفو دودیزو ډولونو جوړ کړي وي.

دلته به مو د نړۍ له مشهورو او لویو میدانونو سره بلد کړو، چې چېرته دي او څنګه جوړښت لري؟

د مکیسکو زوکالو میدان

په مکسیکو کې د Plaza de la Constitucion مشهور میدان چې په زوکالو مشهور دی، د نړۍ له ترټولو مشهورو او لویو میدانونو څخه یو دی.

دا میدان لرغونی تاریخ هم لري. ویل شوي، چې ان د مرکزي امریکا له تمدن سره تړلی میدان دی او زیات وخت یې كیږي.

دغه میدان تاریخي معماري، کلیسا ، متروپولیتن او ملي ماڼۍ لري.

په دغه میدان کې هره ورځ په تشریفاتي ډول د مکزیک تر ټولو سترملي بیرغ رپیږي.

هلته لویې غونډې او مراسم هم ترسره کیږي.

د مراکش جما ال فنا میدان

دا میدان د افریقا لویې وچې تر ټولو ستر او نوموتی میدان ګڼل کیږي.

د دغه میدان لرغونتوب ان دولسمې پېړۍ ته ورګرځي.

دا میدان د مراکش د لرغوني فرهنګ او ارزښتونو ښه استازیتوب کوي.

له دغه میدان څخه د لوی بازار په توګه هم ګټه اخیستل کیږي.

د ایټالیې د سینا ښار میدان

دغه میدان هم د نړۍ له لویو میدانونو ګڼل کیږي.

د میدان لرغونتوب منځنیو پېړیو ته ورګرځي. دا میدان په ډېر ښه او کلاسیک ډول جوړ شوی.

هلته د اس لوبو ترڅنګ نورې مشهورې او لویې لوبې هم کیږي.

د پراګ پخوانی میدان

د پراګ پخوانی میدان، چې د چیک په پلازمېنه کې موقعیت لري، د دغه هېواد تر ټولو لوی او مهم میدان دی.

دا میدان د چالز پله او ونسلاس میدان ترمنځ موقعیت لري.

یاد شوی میدان هم لرغونی جوړښت لري، هم تفریحي او هم زیات سیلانیان ورته راځي.

د واتیکان سنت پیتر میدان

دا میدان د واتیکان سلطنتي میدان ګڼل کیږي او خورا لرغونی دی.

دا میدان د جان لورنزو برنیني له لورې طرحه شوی او په ۱۵۸۶ میلادي کې جوړ شوی دی.

دغه میدان هم لرغونی، هم ښکلی، هم جذاب او هم له نندارچیانو ډک دی.

د پیکن تیانانمن میدان

د چین په پلازمېنه کې موقعیت لرونکی دغه میدان هم د نړۍ له ترټولو لویو میدانونو څخه ګڼل کیږي.

دغه میدان ته نیږدې یو شمېر تاریخي او لرغوني بناوې هم موجودې دي.

د مائو قبر هم همدې میدان ته نیږدې دی.

د چین یو شمېر مهمې تاریخي پېښې هم په یاد شوي میدان کې رامنځته شوي دي.

دا هم د اعتراضونو، هم انقلابونو او هم لویو مرګونو میدان ګڼل کیږي.

د لندن ترافالگار میدان

د لندن ترافالگار هم د نړۍ د لویو او مشهورو میدانونو له جملې څخه دی.

یاد شوی میدان د ناپلیون لخوا د هوراتیو نلسون د بریالیتوب په ویاړ په ۱۸۰۵ کې جوړ شوی دی.

دغه میدان ته نیږدې د یاد شوي هېواد ملي ګالري هم موقعیت لري.

د ماسکو سور میدان

دا میدان د روسیې د پلازمېنې ماسکو په زړه کې موقعیت لري.

هم لرغونی دی، هم تاریخي پېښې پکې شوي، هم کلیسا، تاریخي موزیم او نورې برخې لري.

د لینن قبر هم هملته دی، کرملین ماڼۍ او د روسیې د ولسمشر استوګنځی هم همدلته دی.

دغه میدان په ۱۹۹۰ کې د یونیسکو په تاریخي لیست کې ثبت شوی.

د نیویارک ټایمز میدان

دغه میدان په امریکا کې د سیلانیانو د ډېر پام وړ دی. هر کال تر ۵۰ میلیونو خلک ورځي او خوند ترې اخلي.

دغه میدان خورا رنګین دی، تابلوګانې پکې شته، رستورانتونه او ګڼ تفریح ځایونه لري.

د لیکوال/ لیکوالې په اړه

صادق طارق