ژباړه: عایشه حیدري
ډېنیس اوونر Dennis Avner، د ۱۹۵۸ کال د اګسټ په ۲۷مه د امریکې د متحده ايالاتو په میشیګان کې نړۍ ته سترګې غروړلې دي، نوموړي د ۱۹۵۸ او ۲۰۱۲ کلونو ترمنځ ژوند کړی دی.
نوموړی د امریکې د سمندري ځواکونو انجینیر و، د ۱۹۸۱ په لومړیو کې یې له سمندري ځواکونو سره دنده پرېښوده او په سنټیاګو کې یې د کمپیوټر پروګرام جوړونکي په توګه دنده پیل کړه، دغو کارونو خوند نه ورکاوه.
ډېنیس اوونر د سټاکینګ کېټ Stalking Cat په نامه مشهور د پیشو پړانګ په څېره کې انسان و او په خپل وخت کې د نړۍ د تر ټولو وېرونکې څېرې لرونکی انسان هم ګڼل کېده.
ډېنیس اوونر په ماشومتوب کې له پیشوګانو سره ډېره مینه لرله، او کله چې د نوې ځوانۍ او ځوانۍ عمر ته ورسېده له چیتا او پړانګانو سره یې مینه پیدا شوه. هغه له پړانګانو سره د بېساري مینې له امله هڅه کوله چې خپله څېره د پړانګانو په څېر جوړه کړي او د همدې موخې لپاره یې بیا بیا درنې او پېچلې جراحۍ ترسره کړې دي.
هغه په خپلو هڅو کې بریالی هم شو، او تر جراحۍ وروسته یې څېره په وېرونکې، وحشتناکې او حیرانونکې څېرې بدله شوه. د هغه څېره یوې ښځې او پړانګانو ته ورته وه. ډېنیس به د خپل دغه کار په اړه ویل چې له پړانګانو سره یې د بېسارې مینې له امله خپل مخ داسې جراحي کړی دی، او ویل به یې چې غواړي د پړانګ په څېر و اوسي.
د ۱۹۸۰مو کلونو په لومړیو کې ، ډېنیس د خپل شخصي لید او پړانګانو سره د مینې د احساس له امله، په خپل بدن د رسمونو او د خپل مخ د جراحي کولو او د جراحي پر مټ د څېرې د بدلون پیل وکړ.
په ځينو مرکو کې نوموړي په وار وار ویلي چې د خپلې څېرې فزیکي بدلون غوره ګڼي. ډېنیس د خپل شخصي لید پر بنسټ چې فکر یې کاوه د څېرې دغه ډول بدلون په شمالي امریکا کې د میشت هورن توکم له لرغونو وینډوت دودنو (Wyandot tradition) سره اړخ لګوي، خپله څېره بدله کړه، که څه هم دا د هغه شخصي لید وو نه دودیز عمل، خو هغه خلکو ته دا هم و ویل چې په همدې قبیله کې را لوی شوی دی او ورته ویل شوي وو چې خپلې څېرې ته دې بدلون ور کړي.
نوموړي د پړانګ د څېرې د خپلولو لپاره په جراحي په زرګونو ډالرو لګښت کړی ده او د خپل وخت د نړۍ تر ټولو وحشتناکې مېرمنې په نوم پېژندل شوې وه.
ډېنیس د ۲۰۱۲ زېږدیز د نومبر په ۵مه نېټه د نيژدې ۶۲ کلونو په عمر له نړۍ سترګې پټې کړې دي. د هغه د مړینې خبر یوه اونۍ وروسته خپور شو، په هغه لیک کې چې نوموړي لیکلي وو، یادونه یې کړې وه چې د هغه مړینه ځانوژنه ده.