اقتصاد سیاست له نړۍ

د امریکا او چین اقتصادي جنګ ۲ میلیونه چینایان وزګار کړي

لیکنه: بشر درویش

د معتبرو رسنیو تازه ارقام ښيي، چې د امریکا او چین اقتصادي جګړې تراوسه تر ۲ میلیونو پورې چینایان وزګار کړي او له کاره ویستي.

د اسیا نیوز رسنۍ د راپور له مخې د دغې اقتصادي جګړې زیات تاوان د چین صنعتي برخو ته رسیدلی.

د سرچینې په حواله د چین صنعتي نظام په وروستیو کې ټول ۵ میلیونه کاري فرصتونه له لاسه ورکړي، چې نیږدې دوه میلیونه یې د امریکا د اقتصادي جګړې له کبله دي.

بې ثباته اقتصاد

د چین د اقتصادي وضعیت یو شمېر څېړونکو یادې رسنۍ ته ویلي، چې دغه اقتصادي جګړه د چین د اقتصاد بې ثباتي په ډاګه کوي.

څېړونکو ویلي، چې یا د چین اقتصاد متزلزل دی، یا یې چارواکو بې مسولیتي کړې او د خپلو اقتصادي ننګونو وړاندوینه یې نه ده کړې.

د دوی په خبره لازمه وه، چې د چین دولت له امریکا سره د کیدونکې اقتصادي جګړې وړاندوینه او هم ورسره د مبارزې لپاره وار د مخه لازم تدابیر لرلای.

اوس څه کیږي؟

U.S. President Donald Trump, U.S. Secretary of State Mike Pompeo, U.S. President Donald Trump’s national security adviser John Bolton and Chinese President Xi Jinping attend a working dinner after the G20 leaders summit in Buenos Aires, Argentina December 1, 2018. REUTERS/Kevin Lamarque

د اسیا نیوز د راپورله مخې د چین د واکمن کمونیست ګوند یوه ۲۵ کسیزه ډله ټاکلې څو د دغه اقتصادي وضعیت د کړکېچونو حل ته تدابیر ونیسي.

دغه پلاوی به دا هم څېړي، چې څنګه بې کاره شوي پر نورو کارونو مصروف او د نورو کارونو د خرابیدو مخنیوی وکړي؟

بندیزونه

امریکا له چین سره د اقتصادي اړیکو د خړیدو په درشل کې د دغه هېواد پر یو شمېر مهمو کمپنیو لکه: سوني، سامسونګ،هواوې او نورو بندیزونه لګولي.

د دې ترڅنګ امریکا متحده ایالاتو د چین پر صادراتو ۲۵ سلنه ګمرکي تعارفه لوړه کړې او ۲۰۰ میلیارده ډالره تاوان یې ورته پېښ کړی.

د دې ترڅنګ د چین پر کرنیزو تولیداتو هم تعارفه لوړه شوې او تر ۶۰ میلیارده ډالرو زیان یې چین ته اړولی.

له دې سره هم مهاله د پیسو د نړیوال صندوق رییس خبرداری ورکړی، چې د امریکا او چین اقتصادي جنګ به پر نړیوال اقتصاد هم بدې اغېزې وکړي.

دا راپورونه په داسې وخت دي، چې امریکا او چین په نیږدې ورځو کې د خپلو اقتصادي ناندریو د حل لپاره بیا مذاکرات پيلوي.

دا مذاکرات مخکې څو ځله د ژورو اختلافونو له کبله ناکام شوي او ځنډول شوي دي.

د لیکوال/ لیکوالې په اړه

بشر درویش

بشر درویش د یاران د کاري ټیم غړی دی، چې پر بیلابیلو مسلو د یاران لپاره راپورونه او مطالب چمتو کوي