ملګرو ملتونو اعلان وکړ، چې د دوی له کارکوونکو هم د مراجعینو د جنسي ځورونې په تړاو شکایتونه زیات شوي.
تازه راپور
یاد شوي سازمان په دې تړاو پرون یو راپور خپور کړ، چې پکې ویل شوي: یوازې په ۲۰۱۸ کې د ملګرو ملتونو له کارکوونکو د جنسي ځورونې تر ۲۰۰ ډېر شکایتونه شوي.
دغه راپور د ملګرو ملتونو د سرمنشي دفتر چمتو کړی او خپور کړی.
سرچینه وایي له دغو شکایتونو څخه څه باندې ۱۲۰ یې د ملګرو ملتونو له همکارو ادارو شوي.
د بېلګې په ډول: تېرکال د خوړو له نړیوالې ادارې (ډبلیو ایف پي) څخه د جنسي ځورونو ۱۹ شکایتونه شوي. ورتېرکال دا شکایتونه ۲۶ موردو ته رسیدل.
ویل شوي، چې تر ټولو زیات شکایتونه د ملګرو ملتونو د کډوالو چارو له ادارې ( یو این هیچ سي آر) څخه شوي.
د دغې ادارې کارکوونکي تورن دي، چې د کډوالو د جنسي ځورونې ترڅنګ یې په ځینو برخو کې پردوی جنسي تېری هم کړی.
له دغې ادارې د شکایتونو کچه تېر کال ۳۴ سلنه لوړه شوې ده.
د سوله ساتو ځواکونو سرغړونې
سرچینه وایي تېرکال د ملګرو ملتونو له سوله ساتو ځواکونو څخه د جنسي ځورونو شکایتونه کم شوي.
په ۲۰۱۷ کې له دغو ځواکونو څخه د جنسي ځورونو ۶۲ شکایتونه شوي وو، چې په ۲۰۱۸ کې دا کچه ۵۴ ته ښکته شوې ده.
د جغرافیې په لحاظ ځورونې
د ملګرو ملتونو کارکوونکي په پخوا کلونو کې ترډېره په مرکزي افریقا کې د خلکو په جنسي ځورونو تورن وو.
ملګري ملتونه وایي له پخوا څخه د دغو ځورونو شکایتونه مخ په کمیدو دي او دلیل یې دا دی، چې دوی دا شکایتونه څېړلي، رسنیز کړي او د عاملینو پر وړاندې ګامونه اخیستي.
یاد شوی سازمان ادعا لري، چې دغو ګامونو یې پر دوی د جنسي ځورونو د قربانیانو باور زیات کړی، ځکه خو یې خپلې ستونزې او شکایتونه ورسره شریک کړي.
