ټیانجین؛ اسمانڅکه ودانۍ

ژباړه او راټولونه: عایشه حیدري

په نړۍ کې ډېرې پېژندل شوې او ښکلې ودانۍ شته، خو اسیایي هېوادونه د نړۍ تر ټولو لوړې او زړه راښکونکې ودانۍ لري، دغو ودانیو د اسیا نوم په وار وار په نړۍ کې ځلولی او د دې لامل شوی چې اسیا په نړۍ کې د لومړنۍ لویې وچې په توګه د نړیوالو په منځ کې مطرح کړي چې تر ټولو لوړې او ډېرې اسمانڅکې ودانۍ لري.
د اسیایي هېوادونو له ډلې چین هغه هېواد دی چې تر ټول لوړې او ښکلې ودانۍ لري او د نړۍ د لوړو ودانیو لرونکو هېوادونو په ډلې کې ځانته ځانګړی ځای جوړ کړی دی.
په تېرو لیکنو کې مو د چین د نورو لوړو ودانیو په اړه تاسو ته مالومات درکړل په دې لیکنه کې غواړو د چین يوې بلې لوړې ودانۍ په اړه چې ټیانجین نومېږي مالومات درکړو. له موږ سره مله اوسئ!
ټیانجین Tianjin د چین یوه بله لوړه ودانۍ ده چې د سيټیک ودانۍ څخه یې هم لوړوالی ډېر دی. کېدای شي د ټیانجین ودانۍ معمارانو دا هیله درلودله چې د CTF یا ټیانجین مالي مرکز Tianjin Finance Center د نړۍ تر ټولو لوړه ودانۍ وي او یا کېدای شي دا هیله یې درلودله چې د ټیانجین ودانۍ د نړۍ د لوړو ودانیو په ډلې کې ثبت شي او دغه ودانۍ نه یوازې په چین بلکې د نړۍ په ګوټ ګوټ کې د ښکلا اوازه خپره کړي. د ټیانجین ودانۍ معماران خپلو دغو ټولو موخې ته رسېدلي دي او په رښتیا هم د ټیانجین ودانۍ په جوړولو سره دغه ودانۍ د نړۍ په لوړو ودانيو کې ثبت شوه او په ټوله نړۍ کې یې د ښکلا اوازه هم خپره شوه او تر نن پورې د نړۍ په لوړو ودانیو کې اووم ځای لري.
د ټیانجین اسمانڅکه د ۵۳۰ مترو په لوړوالي ۹۶ پوړونو په لرلو د نړۍ د ښکلو او لوړو اسمانڅکو ودانیو په کتار کې ځانګړی ځای لري، د یادې ودانۍ د جوړیدلو چارې په ۲۰۱۹ زېږدیز کال کې پای ته ورسېدې او په یادې ودانۍ کې سوداګريزې ادارې، شرکتونه او ډېر رسټورانټونه شته چې خوندور خواړه پکې پخېږي.
کله چې په لومړي ځل د ټیانجین ودانۍ و وینئ دغې ودانۍ ته به د يوه مخروطي (مښوکه) ته ورته بڼې ګمان به پرې وکړئ او همداسې هم ده، د ټیانجین ودانۍ طراحانو د دې لپاره د دغې ودانۍ ظاهري بڼه په مخروطي بڼه جوړه کړې چې دغه ودانۍ د نړۍ هر ډول افتونو او زیانونو په ځانګړي ډول د باد او توپان له زیانونو څخه څخه په امان اوسي.
په حقیقت کې کله چې په دغې سیمې کې باد او یا توپان کېږي د دغې ودانۍ جوړونه داسې شوې چې ټول بادونه او توپانونه دفع کوي او په وړاندې یې ځواکمن دفاعي جوړښتونه لري. د ټیانجین ودانۍ ځانګړی او حیرانونکی ټکی دا دی چې د‌ دغه برج د وروستني پوړ څخه د چین ډېرې لرې او ښکلې سیمې لیدلای شئ.
د ټیانجین په ودانۍ کې د سیلانیانو، هټیوالو او کارکوونکو د ښکته پورته کېدو لپاره پرمختللی او چټک لیفټ جوړ شوی دی چې په ډېرې لږې مودې کې کولای شي دې ودانۍ ته ورتلونکي خلک د ودانۍ لوړ پوړونو ته و رسوي او بېرته یې را ښکته کړي.

Be the first to comment

Leave a Reply

Your email address will not be published.