پنټاګون: د طالبانو بریدونه بیځایه دي، زموږ د وتلو پر بهیر اغېز نه شي کولی

پنټاګون کندهار کې د امریکایي ځواکونو پر اډه د طالبانو توغندویي بریدونه غندلي دي.

د امریکا د دفاع وزارت ویاند جان کربي وایي دغه بریدونه چې د تېرې اوونۍ په لومړیو کې د دوی پر اډه د طالبانو له لوري تر سره شول په هیڅ ډول د امریکایي ځواکونو د وتلو بهیر نه اغېزمنوي.

نوموړي زیاته کړې، چې دغه ډول واړه بریدونه بې اغېزې دي او د دوی د وتلو پر څرنګوالي هیڅ تاثیر نه شي لرلی.

د ویلو ده چې تر یاد برید وروسته په افغانستان کې د ناټو ځواکونو عمومي قومندان جنرال سکاټ مېلر هم د طالبانو له لوري ورته بریدونه یوه تېروتنه بللې وه او له طالبانو یې غوښتي و چې باید د ځواکونو د وتلو پر مهال د ورته تېروتنې له تکراره ډډه وکړي.

د یادونې ده چې تېره ورځ واشنګټن پوسټ ورځپاڼې په کندهار ولایت کې د امریکایي ځواکونو پر اډه د طالبانو وروستي توغندویي برید ته په اشارې ویلي چې ښایي په راتلونکو میاشتو کې په افغانستان کې پر امریکایي اهدافو ورته بریدونه ډېر شي.

ورځپاڼه لیکي، په کندهار کې شوي برید ته په کتو داسې ښکاري چې ښایي په افغانستان کې د تاوتریخوالي د ډېرېدو تر څنګ پر امریکایي اهدافو هم بریدونه زیات شي.

د ورځپاڼې په خبره، امریکا او طالبانو د دوحې هوکړه کې پرېکړه کړې وه چې د مې میاشتې تر ۱۱مې به ټول امریکایي سرتېري له افغانستان څخه وځي خو بایډن د یادې هوکړې تر ارزولو وروسته دا موده وغځوله چې دې چارې طالبان غوسه کړل او خبرداری یې ورکړ چې امریکا هوکړه نقض کړې ده نو د بدو عواقبو پړه به یې هم د دوی پر غاړه وي.

بلخوا د امریکا لوی درستیز جنرال مارک مېلي له اسوشیټډ پرس اژانس سره په مرکه کې یو ځل بیا له افغانستان څخه د امریکایي ځواکونو تر وتلو وروسته پر دوو احتمالي نتیجو خبرې کړې دي.

نوموړي په خپلو خبرو کې ویلي چې افغان ځواکونه پياوړي، روزل شوي، مجهز او په ښه روحیه سمبال دي خو په خبره یې کېدای شي د طالبانو پر وړاندې له بدو پایلو سره مخ شي.

نوموړي زیاته کړې چې دا یو احتمال دی چې ښایي افغانستان له ډېرو بدو پایلو سره مخ شي خو دا احتمال هم لرې نه دی چې افغان پوځ به له خپل حکومت سره یو ځای پر ټولو ستونزو برلاسی شي.

مېلي د افغان دولت او طالبانو ترمنځ مذاکرات مهم بللي دي او ټینګار یې کړی دی چې افغانان په خپلمنځي خبرو خپل هېواد له کورنۍ جګړې ژغورلی شي.

ایا اصغر افغان به بېرته لوبډلمشر شي؟

by سمیع الله درانی in سپورټ

د سلېکشن کمېټې تېره میاشت حشمت الله شهیدي د ټېسټ او یو ورځنیو لوبو لوبډلمشرکړ، کابو دوه اونۍ وړاندې یې راشدخان د شل اوریزو لوبو لوبډلمشر اعلان کړ. رحمت شاه د ټېسټ او یو ورځنیو ... نور ولولئ