سپورټ کرکټ وزش او تمرین

شپږیزه؛ د شاپور میس عینک او د اصغر ښامارانو خپلي دریمي لوبي وګټلې

خبریال: فضل الله فضلي

د شپږیزه کرکیټ لیګ په اووم پړاو سیالیو کي نن میس عینک اتلان د سپین غر زمریانو پر وړاندي او آمر نهنګان د بندآمیر ښامارانو سره ولوبېدل.

د لیګ شپږمه او د نن لومړۍ لوبه بندآمیر ښامارانو د آمو نهنګانو څخه په ۷ ویکیټو وګټل.

د لوبي پچه د ښامارانو لوبډلمشر اصغر افغان وګټل او د آمو لوبډلي د جاوید احمدي په لوبډلمشرۍ د ۵ لوبغاړو په سوځېدو سره د ۱۴۳ منډو هدف ورکړ.

د آمو لپاره غوره توپ وهنه درویش رسولي وکړه او ۵۲ ناسوځېدلي منډي یې وکړې او بل اړخ ته د ښامارانو لپاره په غوره توپ اچونه کي شراف الدین اشرف دوې ویکيټي واخیستې.

په دوهمه پاڼۍ کي د ښامارانو لوبډلي د آمو ورکول سوی هدف په ۱۸م اور کي د درو لوبغاړو په سوځېدو سره پوره کړ.

د ښامارانو لپاره په غوره توپ وهنه کي عثمان غني ۵۷ منډي وکړې، خو د آمو لپاره بیا یوازني درې سره لوبغاړي عبدالواسع وسوځول.

د لوبي غوره لوبغاړی له بندآمیر ښامارانو څخه عثمان غني وټاکل سو.

د لیګ په ۷مه او د نن په دوهمه لوبه کي بیا د شاپور ځدران په لوبډلمشرۍ د میس عینک اتلانو لوبډلي د کریم صادق په لوبډلمشرۍ د سپین غر زمریانو ته په ۵۸ منډو ماته ورکړه.

د لوبي پچه شاپور ځدران وګټل او په توپ وهنه کي یې د سپین غر زمریانو ته د ۴ لوبغاړو په سوځېدو سره د ۲۲۲ منډو هدف ورکړ.

د میس عینک لپاره په غوره توپ وهنه کي شهزاد محمدي ۵۲، بهار شینواري ۶۵ او حشمت الله شاهدي بیا ۵۳ منډي وکړې.

د سپین غر لپاره عبدالله عادل ۲ لوبغاړي وسوځول.

د لوبي په دوهمه پاڼۍ کي د سپین غر زمریان نه وتوانېدل چي د میس عینک هدف پوره کړي او په ۱۹ اورونو کي یې ۱۶۳ منډي وکړې او ټول لوبغاړي یې وسوځېدل.

د میس عینک لپاره په غوره توپ اچونه کي عبدالله مزاري ۴ او لوبډلمشر شاپور ځدران ۳ ویکيټي ترلاسه کړې.

د لوبي غوره لوبغاړي هم له میس عینک څخه بهار شینواری وټاکل سو.

سبا هم دوې لوبي ترسره کیږي.

لومړۍ لوبه د بُست ساتونکو او سپین غر زمریانو ترمنځ ده او دوهمه لوبه د کابل بازانو او آمو نهنګانو ترمنځ ترسره کیږي.

د لیکوال/ لیکوالې په اړه

فضل الله فضلي

په کندهار کي د یاران ویب پاڼي لیکوال او ژورنالیست.
زده کړي: کندهار پوهنتون د ژورنالیزم او عامه اړیکو پوهنځی محصل
رسنیزه دنده: ۹ کاله
نوري دندي: هیواد راډیو تلوېزیون او افغانستان ورزشي خبریالان فدراسیون کي ورزشي خبریال، د یو خصوصي انستیتوت د عامه اړیکو مدیر، د سولي ږغ ټولني ولایتي غړی او کندهار پوهنتون پاچاخان علمي څېړنيز مرکز د سولي کلب غړی.

تبصره مو ولیکئ