سینما او موسیقي

سیتا قاسمي او د بېلتانه سندرې؛ طلاق شوی خاوند یې بیا دا ملامتوي

لیکنه: یاران هنر
اعلان

لیکنه: صادق طارق

سیتا قاسمي د هېواد مشهوره او ډېره ځلیدلې سندرغاړې ده، چې د نورو سندرو ترڅنګ یې د بېلتانه له سوزه ډکې سندرې ډېر مینه وال لري.
هغه په لږ وخت کې ډېره وځلیده او په نړیواله کچه یې د افغان سندرغاړو په ډله کې نوم د بره وخوت.

پېژندنه
سیتا قاسمي په کابل کې زیږیدلې او تر لسم ټولګي یې د پنجصد فامیلي لېسه لوستې ده.
هغه په ۱۹۹۶ کې هغه مهال چې د لسم ټولګي زده کوونکې وه، د جګړو له کبله د هېواد پریښودو ته اړ شوه.
کورنۍ سره لومړی د پېښور ناصر باغ او بیا د المان فرانکفورت ته لاړه، چې تراوسه هملته ژوند کوي.

وحید قاسمي سره تړاو
په ځینو راپورونو کې سیتا قاسمي د مشهور سندرغاړي وحید قاسمي د کورنۍ غړې ګڼل شوې، خو وحید قاسمي په یوه مرکه کې دا خبره رد کړې.
قاسمي ویلي، چې سیتا د یوې غوره هنرمندې په توګه پېژني او له دې اخوا کورنۍ اړیکې نه سره لري.

هنري ژوند
سیتا قاسمي له وړوکوالي هنر سره لېواله وه، تراوسه یې څه باندې ۲۰ سندرې ویلي چې هرې یوې ډېرمینه وال موندلي.
د سیتا کمال دا دی، چې د ښه غږ، ښایست او جذابیت ترڅنګ د شاعرۍ، کمپوز جوړولو او نورو هنري وړتیاوو څخه هم برخمنه ده.
هغې د خپلو یو شمېر سندرو شعرونه او کمپوزونه خپله جوړ کړي.

ګډې سندرې
سیتا قاسمي یو شمېر سندرې له نورو مشهورو سندرغاړو سره په ګډه ویلي.
په دې برخه کې شفیق مرید، ولي، بشیر همدرد، آریس پرویز او یو شمېر نورسندرغاړي یادولی شوو.
سیتا یوه ښه ویانده هم ده او په یوه خصوصي تلویزون کې یې څه موده هنري خپرونې مخته وړي.
د هغې تلویزوني خپرونو هم ګڼ مینه وال لرل.
د سیتا ډېرې سندرې په فارسي ژبه دي.

طلاق او د بېلتانه سندرې
د سیتا قاسمي په سندرو کې د بېلتانه، مینې، بې وفایۍ او یوازې توب د سوز ګیلې او انعکاس ډېر لیدل کیږي.

دلیل یې ممکن د ژوند له ملګري د هغې بېلوالی او له هغه څخه نارضايتي وي.

هغې که څه هم په رسمي ډول د ژوند د جلا شوي ملګري په اړه یې کوم اعتراف نه دی کړی، خو د سندرو له سوزه یې ښکاري چې هغه ملامتوي.

سیتا د فاروق کریمي په نوم له یوه کس سره واده کړی و، چې د واده ثمره یې دوه ماشومان وو.

دوی له څو کلونو راهیسې سره بېل شوي.
فاروق کریمي په یوه مرکه کې ویلي: سیتا راته ډېره ګرانه وه، ښه پالنه مې ترې کوله، خو هغې رانه لاره جلا او خواشینی یې کړم.

د لیکوال/ لیکوالې په اړه

یاران هنر