سپورټ فوټبال

رونالډو: په ماډریډ پسي خفه شوی یم

پرون دوشنبه د نړۍ نوموتي لوبغاړي کریسټیانو رونالډو د (مارکا لینډا) جایزې ترلاسه کولو لپاره د خپلي مخکینۍ لوبډلي ریال ماډریډ ښار ماډریډ ته تللی وو، چي هلته ئې د جایزې په یادو مراسیمو کي خپلي مېرمني جورجینا، د رونالډو مدیر ژرژ مندس او د ریال ماډریډ لوبډلي رئيس فلورنتینو پرز ګډون کړی وو.

د فوټبال په نړۍ کي د مارکا لینډا دا جایزه هغه لوبغاړو ته ورکول کیږي، چي له تېرو څو کلنو راهیسې ئې ښې لوبي ترسره کړي وي، چي رونالډو ته په دې خاطر دا جایزه ورکړل سوه، چي دی په خپل لوبیز ژوند کي د انګلستان، اسپانیې او آیټالیا په لیګونو کي ئې لوبډلي قهرماني ترلاسه کړې.

15644198187372.jpg

دا جایزه چي له ۱۹۹۷م کال څخه راورسته کامیاب لرونکي لوبغاړي ته ورکول کیږي، تر دې مخکي، جوردن، ماراډونا، پله، نادال، فلپس، بولټ او لیونل میسي خپله کړې.

رونالډو په یادو مراسیمو کي د ماډریډ په اړه وویل«ماډریډ خاص ښار دئ، ما ډېرو ښارونو ته سفرونه کړي، خو د ماډریډ په ډول ډېر لږ ښارونه پيداکیږي، دې ځای کي مي اولادونه پيدا سوي، زه د ماډریډ سره مینه لرم او ډېر ژر به دې ښار ته بیرته راوګرځم»

رونالډو د ماډریډ ښار ترڅنګ د خپلي کړي جایزې (مارکا لینډ) په اړه وویل«دا جایزه مي د ژوند په خاطراتو کي خاص ځای لري، دا جایزه په دې خاطر راکول سوې، چي ما په ریال ماډریډ لوبډله کي ډېر څه وکړل، دا یوه اسپانوۍ جایزه ده او د دې په خپلولو سره زه ډېر خوشحاله یم، له ټولو هغه کسانو څخه مننه کوم، چي ددې جایزې په خپلولو کي ئې زما سره مرسته کړې»

67401722_10158778092867306_1895827336440315904_n.jpg

هغه دا هم وویل، چي هیله لرم د سروزو توپ هم ترلاسه کړم.

د مارکا لینډا تر جایزې خپلولو وروسته رونالډو او د ریال ماډریډ لوبډلي رئیس پرز په غېږ کي سره ونیول او یو ځای ئې عکس سره واخیست.

رونالډو د فوټبال په نړۍ کي یو وتلی لوبغاړی دئ، چي اوس د ایټالیا کلب جیونټوس سره لوبیږي.

هغه تر جیونټوس مخکي د ریال ماډریډ او تر ریال ماډریډ مخکي بیا د منچسټر یونایټیډ سره ولوبېد.

د لیکوال/ لیکوالې په اړه

محمد صابر حمیدي ، کندهار کې د یاران د کاري ټیم غړی

محمد صابر حمیدي په کندهار کې د یاران د کاري ټیم غړی دی. نوموړې پر دې سربیره د کندهار ولایت د ښوونې او روزنې د پوهنتون د پښتو څانګې د څلورم کال محصل دی او د ” زما“ راډیو خبري برخه کې کار کوي. صابر د فوټبال لوبغاړی دی. یاران ته په سپورټي، ټولنیزو او نورو برخو کې لیکنې او مطالب چمتو کوي. په یاران کې د نوموړي د ټولو لیکنو د بیا خپرولو حق له یاران سره خوندي دی.