سپورټ فوټبال

فوټبال: ریال ماډریډ د اتلولۍ په لټه!

د اسپانیا هیواد لالیګا لیګ د ۳۶مې اونۍ په لوبو کې تېره شپه ریال ماډریډ فوټبال لوبډله د ګراناډا فوټبال لوبډلې سره میدان ته کښته شوه.

په یاده لوبه کې ریال ماډریډ ۲ ګولونه پر ۱ ګراناډا ته ماتې ورکړه.

د ریال ماډریډ لپاره پرلینډ مینډي په ۱۰مه او کریم بنزمان بیا په ۱۶مه دقیقه کې ګولوهنې ترسره کړې.

د ګراناډا لپاره بیا یوازینی ګول ډروین مېچیس د لوبې په ۵۰مه دقیقه کې وواهه.

په دې بریا سره ریال ماډریډ د اسپانیا لالیګا لیګ په سیالیو کې نور هم ځان اتلولۍ ته نژدې کړ.

دا لوبډله اوس د لالیګا لیګ د نمرو په جدول کې د ۸۳ نمرو په درلودلو سره لومړی ځای لري او د بلې نامتو لوبډلې بارسلونا څخه ۴ نمرې مخکې ده.

په لالیګا لیګ کې اوس ریال ماډریډ او بارسلونا دواړو ته دوې ـ دوې لوبې پاتې دي.

بارسلونا لالیګا لیګ کې ۳۷مه لوبه راتلونکې پنجشنبه ۱۱:۳۰ بجې د اوساسونا په وړاندي او په لالیګا لیګ کې به بیا خپله وروستۍ او ۳۸مه لوبه د رواني جولای میاشتې په ۱۹مه نیټه د الاوز په وړاندې ترسره کړي.

ریال ماډریډ فوټبال لوبډله بیا د اسپانیا لیګ په سیالیو کې خپله ۳۷مه لوبه راتلونکې پنجشنبه ۱۱:۳۰ بجې د ویاریال په وړاندې او د ۳۸مه لوبه به بیا د روانې جولای میاشتې په ۱۹مه نېټه د لګانس په وړاندې ترسره کړې.

د اسپانیا لالیګا لیګ دا روان پړاو ۸۹یم دی.

د دې لیګ ډېره اتلولي ریال ماډریډ ۳۳ ځله او بارسلونا بیا ۲۶ ځله خپله کړې.

دا سیالۍ هر کال د اسپانیا هیواد په بیلابیلو ښارونو کې د ۲۰ قوي لوبډلو ترمنځ ترسره کیږي.

د لیکوال/ لیکوالې په اړه

محمد صابر حمیدي ، کندهار

محمد صابر حمیدي په کندهار کې د یاران د کاري ټیم غړی دی. نوموړی پر دې سربیره د کندهار پوهنتون د ښووني او روزنې پوهنځی د پښتو څانګې د څلورم کال محصل دی او د ” زما“ راډیو خبري برخه کې کار کوي. صابر د فوټبال لوبغاړی دی. یاران ته په سپورټي، ټولنیزو او نورو برخو کې لیکنې او مطالب چمتو کوي. په یاران کې د نوموړي د ټولو لیکنو د بیا خپرولو حق له یاران سره خوندي دی.

تبصره مو ولیکئ