سپورټ کرکټ وزش او تمرین

راشدخان: کاش مور او پلار مې ژوندي وایی، چې زما لویه لاسته‌راوړنه یې لیدلې وای

لیکنه: محمدصابر حمیدي

د افغانستان د کرکټ ملې لوبډلې نامتو او تکړه لوبغاړي راشدخان ارمان پر خپلې ټویټر پاڼې ویلې، کاش مور او پلار مې ژوندی وایی، چې د هیواد لپاره یې زما دا لاسته راوړنه لیدلې وای.

راشدخان ارمان پر خپلې رسمې ټویټر پاڼې د دې ترڅنګ له ولسمشر اشرف غني څخه مننه کړې، چې ورته عالي دولتي مډال ورکوي.

هغه لیکلي:

«کاش چې مور او پلار مې ژوندي وای او د هیواد له‌پاره یې زما دا لاسته راوړنه لیدلې وای. له ولسمشر څخه مننه کوم، چې زما د هڅو قدرداني کي راته عالي دولتي مډال راکوي. زه راتلونکي کې هم همدا هیله لرم، چې خپل ګران هیواد افغانستان ته لا ډېر ویاړونه راوړم.»

د راشدخان ارمان مور یو کال وړاندې، خو پلار یې بیا دوه کلونه مخکې د ورپيښو ناروغیو له امله وفات شول.

راشدخان ارمان وروسته له هغه دا خبرې کوي، چې ولسمشرۍ ماڼۍ د کرکټ بورډ په غوښتنه راشدخان ته د ستر دولتي مډال د ورکړې حکم صادر کړ.

افغان کرکټ بورډ وايي چې ولسمشر غني د جمهوري ریاست د چارو ادارې ته سپارښتنه کړې، تر څو د کرکټ ملې ټیم لوبغاړي راشدخان ته د هغه وروستیو لاسته راوړنو له امله د ستر دولتي مډال د ورکړې لړۍ ژر تر ژره بشپړه کړي.

کرکټ بورډ دغه راز وايي، چې یاد مډال به د ولسمشر له لوري د یو لړ ځانګړو مراسمو په ترڅ کې راشدخان ته ورکړل شي.

ولسمشر راشدخان ارمان ته د مډال د ورکولو حکم وروسته له هغه صادروي، چې راشدخان ارمان لومړی په یوې لسیزه کې د شل اوریزه سیالیو په غوره لوبډله کې راغلی او بیا په یوې لسیزه کې د یاد فارمټ تر ټولو غوره لوبغاړی ونومول شو.

د راشدخان دا بریالیتوب په داخلي او نړیواله کچه زیات وستایل شو.

د لیکوال/ لیکوالې په اړه

محمد صابر حمیدي ، کندهار

محمد صابر حمیدي په کندهار کې د یاران د کاري ټیم غړی دی. نوموړی د کندهار پوهنتون د ښووني او روزنې پوهنځی د پښتو څانګې څخه فارغ شوی. په کندهار کې د ” زما“ راډیو سره په خبري برخه کې کار کوي. صابر د فوټبال لوبغاړی دی. یاران ته په سپورټي، ټولنیزو او نورو برخو کې لیکنې او مطالب چمتو کوي. په یاران کې د نوموړي د ټولو لیکنو د بیا خپرولو حق له یاران سره خوندي دی.

تبصره مو ولیکئ