اپریل 21, 2021

ژوند لیک یې؛ له مشهور قاري شېخ عبدالرحمن السدیس سره اشنا شئ

د نړۍ د مشهورو قاریانو د معرفۍ په لړۍ کې یاران وېب پاڼه نن د شیخ عبدالرحمن سدیس ژوند لیک درسره شریکوي.
زوکړه
شېخ قاري عبدالرحمان السدیس په ۱۳۸۲ هجري قمري کال د سعودي په پلازمېنه ریاض ښار کې دې نړۍ ته سترګې پرانیستي دي.
د هغه د نسب سلسله د (عنزه) مشهورې قبیلې ته رسیږي.
دا قبیله د سعودي د قصیم سیمې اوسیدونکې وه.
زده کړې
قاري سدیس خپلې لومړنۍ زده کړې په المثنی بن حارث مدرسه کې کړي، بیا د ریاض علمي موسسې ته ورغلی او ترهغه وروسته یې له مشهورو اسلامي پوهانو : شيخ عبد الله المنيف، شيخ عبد الله بن عبد الرحمن التويجري او نورو سره زده کړې کړي.
هغه د قرآنکریم حفظ په ۱۲ کلنۍ کې کړی.
عبدالرحمن په ۱۳۹۹ کال د معهد له زده کړو په ممتازه درجه فارغ او بیا د ریاض پوهنتون د شرعیاتو په پوهنځي کې شامل شوی.
په کال ۱۴۰۳هجري له دغه پوهنتون څخه فارغ او بیا یې د ریاض په یو شمېر مسجدونو کې د امامت او خطابت دنده ترسره کړې ده.
مسولیتونه

شیخ عبدالرحمن سدیس په ۱۴۰۴ هجري قمري کال کې د الحرام مسجد د خطیب او امام په توګه وټاکل شو.
په ۱۴۰۸ هجري قمري کې یې د خپلو لوړ زده کړو یا ماسټرۍ سند د فقې د اصولو په برخه کې له “الامام محمد بن سعود الاسلامیة” پوهنتون څخه واخیست.
وروسته د دندې لپاره مکې مکرمې ته لاړ او په ام القری پوهنتون کې په تدریس بوخت شو. هلته یې د فقې د اصولو په برخه کې د خپلې دوکتورا زده کړې هم وکړې.
قاري سدیس اوس هم په ام القری پوهنتون کې د استاد په توګه دنده مخته وړي.
شیخ عبدالرحمن سدیس د کم عمرۍ باوجود په ۳۲ کلنۍ کې د مکې معظمې په جومات کې د تراویح امامت ته ومنل شو.
ده ته د دغه لوی امتیاز د ورکړې لوی دلیل په ډېر خواږه غږ او په پوره تجوید د قرآنکریم د تلاوت د وړتیا لرل و.
ویاړنې
قاري عبدالرحمن سدیس په ۱۴۲۶ هجري قمري کې د جائزه دبي للقران بنسټ له لورې د اسلامي نړۍ د غوره شخصیت په توګه وپېژندل شو.
قاري سدیس د الحرام مسجد پر امامت او د ام القری پوهنتون پر استادۍ سربېره په ګڼو تلویزوني خپرونو، پوهنتونونو، علمي سفرونو او نورو کې د اسلامي ښوونو له ثوابه ډک کار ترسره کړی.
شخصي ژوند
شیخ عبدالرحمن سدیس واده کړی او د عبدالعزيز، صهيب او عبدالله په نومونو زامن لري.
دغه راز د سمية و أميمة و نسيبه و مليكة په نومونو لوڼې هم لري.

د حافظې ارزښت

لیکوال: عایشه حیدري ، کابل - برخه : روانې سلامتي

کېدای شي تاسو په ژوند کې د حافظې په ارزښت پوه شئ خو موږ غواړو په دې اړه تاسو ته لږه توضیح درکړو، ځکه چې که تاسو د حافظې د ارزښت په اړه پوه شئ ... نور ولولئ