فبروري 28, 2021

ملالې يوسفزۍ ته د پرينکا چوپړا مبارکي او د علي وزير پېغور

خبريال: مدثر دعوت

د باليووډ سېنما مشهوري اداکاري پرينکا چوپړا ، ملالې يوسفزۍ ته د پوهنتون څخه د فراغت مبارکي ويلې.
د نوبل د جايزې ګټوونکې او د ښځو د حقوقو فعاله ملاله يوسفزۍ څو ورځې وړاندې د انګلستان د اکسپورډ پوهنتون د فلسفې، سياست اقتصاد د څانګې څخه فارغه شوه چې په نړيواله کچه ډېريو کسانو ورته مبارکۍ وويلې.
او اوس بيا د يونسيف د ښه نيت سفيرې، د باليووډ او هاليووډ ښځينه اداکارې او سندرغاړې پرينکا چوپړا د ټولنيزو رسنيو له لارې ملالې يوسفزۍ ته مبارکي ويلې او ددې فراغت يې حيرانوونکی بللی دی.
پرينکا د خپل انسټاګرام اکاونټ سټورۍ کې خپل او د ملالې يوسفزۍ عکس خپور کړی او ورسره ليکلې يې دي: “ملالې فراغت دې مبارک شه، سياست، فلسفې او اقتصاد په برخه کې ستا سند يوه نه مننونکې لاسته‌راوړنه ده، زه ډېر درباندې وياړم”.

پرينکا او ملالې يوسفزۍ په ۲۰۱۷ز  کې په امريکا متحده ايالاتو کې هغه وخت سره وليدله چې پرينکا د ملالې يوسفزۍ خيريه بنسټ ته خيرات ورکوی.


ملاله يوسفزۍ د ۱۷ کلونو په عمر وه چې د نوبل جائزه يې وګټله ،اوسمهال ۲۲ کلنه ده چې د سياست، فلسفې او اقتصاد په برخه کې يې د ليسانس سند ترلاسه کړ، او خپله بريا يې د خپلې کورنۍ سره يوځای د کيک په پرېکولو سره ونمانځله.


دې درې اوني وړاندې په امريکا کې د تور پوستو د ټولنې په ملاتړ ټويټ کړی و او هغوی ته يې د عدالت غوښتنه کړې وه چې د ډېريو پښتنو د سخت غبرګون سره مخ سوه.
ملالې پر خپل ټويټر اکاونټ ليکلي: “زه د تور پوستو د ټولنې سره د احمود اربري، بيرونا ټايلر جورج فلويډ او نورو لپاره د عدالت غوښتنې د مبارزې لپاره ولاړه يم، موږ په هېڅ قېمت ظلم نه شو منلای”


د دې پر دې ټويټ ډيريو پښتنو او بلوڅانو خپلې نظريې ورکړي چي اکثرو يې ورباندې نيوکې کړي چې ولي د بلوڅانو او پښتنو د حقوقو او عدالت لپاره ږغ نه پورته کوي.
د پښتون ژغورنې د غورځنګ غړي علي وزير هم د ملالې يوسفزۍ ټويټ، ريټويټ کړی او د پيغور په ډول يې ورباندې نقد کړی.
علي وزير پر خپل ټويټر اکاونټ ليکي: “د جنوبي اسيا د فاشيستو رژيمونو لخوا د لږکيو بلوڅو او پښتنو د نسل وژني په وړاندې څه واياست، دلته چې کومې ګناوې کېږي د امريکا تر پېښو لس چنده اظافه دي”


د علي وزير مطلب دا و چې ولې يې تر اوسه د پښتنو يا بلوڅو ملاتړ نه دی کړی يا يې ولې تر اوسه د پاکستان پر وړاندې ږغ نه دی پورته کړی او ولې په خپلې شاوخوا او سيمه کې ظلمونو او نسل‌وژنې باندې چپه خوله پاتې ده.
د ملالې يوسفزۍ په اړه دا لومړی ځل نه دی چې د پښتون ژغورنې د غورځنګ يا نورو پښتنو لخوا نيوکې کېږي.
په پاکستان کې ميشت پښتانه ډېری وخت د ملالې يوسفزۍ پر دريځ سختې نيوکې کوي، ځکه ددوی په خبره ملاله يوه پښتنه ده بايد د پښتنو ملاتړ وکړي او د پاکستاني رياست د بې عدالتيو پر وړاندې خپل غږ پورته کړي.

لومړي کس و اوسه چې پر دې لیکنه نظر لیکي

نظر مو ولیکئ

ستاسو د ایمیل پته نه خپریږي