سیاست له نړۍ

د برازیل ولسمشر: خلک دې په ورځ کې ۲ ځلو نه زیات تشناب ته نه ځي

لیکنه: بشر درویش

د چاپېریال ساتنې مسئله په نړیواله کچه په وروستیو کې له جدي او تودو بحثونو څخه ده.

نړیوال چاپېریال په وروستیو کې د صنعتي کیدو له ګړندي کیدو سره خوار ککړ شوی او د لا ککړتیا پر لور روان دی.

دا وضعیت سبب شوی، چې په نړیواله کچه چاپېریالي ستونزې د یوې لویې ننګونې په توګه بحث شي.

د چاپېریال ساتنې مدافعانو دا موضوع په نړیواله کچه جدي کړې او هر کال یې په اړه د لوړپوړو نړیوالو کنفرانسونو جوړولو ته مخ اړولی دی.

د دې ترڅنګ د هېوادونو په کچه هم خاص تدابیر نیول کیږي، چې څنګه د چاپېریال ساتنې په برخه کې سم کار وشي.

دلته د دغو هڅو له منځه یو جالب وړاندیز درسره شریکوو.

د برازیل د ولسمشر وړاندیز

د برازیل ولسمشر ژائیر بولسونارو په وروستیو کې د هېواد د چاپېریال ساتنې پر وضعیت یې اندیښنه ښودلې او د حل لپاره یې عجیبې خبرې کړي.

هغه ویلي: خلک دې له چاپېریال ساتنې سره د مرستې لپاره په یوه شپه او ورځ کې یوازې دوه ځلې تشناب ته لاړشي!

دغه ښي اړخ ولسمشر دا هم ویلي، چې د تشناب ته لږ تلو اسانه لاره لږ خوراک دی.

د ده په وینا که خلک لږ خوراک ـ څښاک وکړي، اقتصاد ته به یې هم ګټه رسیدلې وي او چاپېریال ته هم.

برازیلي ولسمشر همدا شان د اولادونو لږ زیږول هم اړین ګڼلي او له خلکو یې ورته پاملرنه غوښتې ده.

له دې سره یې ویلي، چې که څوک د خپلو کورنیو غذایي سیستم په لږ خوراک باندې عیارولای شي، د ده په شان کولای شي، چې پينځه اولادونه هم ولري.

د ټوکو وړ خبره

د برازیل د ولسمشر دغه خبره یو شمېر خلکو ریشخند کړې او ویلي، چې په یوویشتمه پېړۍ کې داسې خبره عقل و منطق نه مني.

د منتقدینو په وینا ولسمشر باید د یوه مسول مقام په توګه د حکومتولۍ داسې سیستم رامنځته کړي، چې هم د چاپېریال د وضعیت، هم د خلکو صحت او هم نورو اړتیاوو ته لازمه پاملرنه وکړي.

د ویلو ده، چې یاد شوی وړاندیز د بڼې له مخې بیخي نوی او جالب دی.

منتقدینو یې دا وړاندیز(احمقانه وړاندیز) ګڼلی، خو د ولسمشر پلویانو د وړاندیز هرکلی او ملاتړ کړی دی.

د لیکوال/ لیکوالې په اړه

بشر درویش

بشر درویش د یاران د کاري ټیم غړی دی، چې پر بیلابیلو مسلو د یاران لپاره راپورونه او مطالب چمتو کوي