افغانستان سرسکالو سوله سیاست

افغانستان کې د جګړې زیاتوالی؛ میلر وايي، طالبان دې تاوتریخوالی کم کړي

لیکنه: بشر درویش
راپور: بشر درویش

په افغانستان کې د امریکایي ځواکونو قومندان وايي، طالبان باید د سولې پروسې ته دوام ورکولو لپاره تاوتریخوالی کم کړي.

قومندان سکاټ میلر د افغانستان شمالي ولایتونو ته د سفر پرمهال وویل طالبان باید روان تاوتریخوالی کم کړي.

ده زیاته کړه چې افغان خلک سوله غواړي، او موږ د سولې پروسې لپاره سمه لار غوره کړې ده.

د افغان دفاع وزارت مرستیال شاه محمود میاخیل چې له نوموړي سره په سفر ملګری و، ویلي چې د لیدنې هدف په سیمه کې د امنیتي وضعیت کتنه او له افغان اردو سره مرسته کول دي.

ښاغلي میاخیلي په ټینګار سره څرګنده کړې چې د دښمنانو سره په مبارزه کې د افغان ځواکونو هدف د جګړې پای او په افغانستان کې د سولې په لور د باور رامینځته کول دي.

شاه محمود میاخیل – سکاټ میلر

ښاغلي میاخیل او میلر دا خبرې داسې مهال کړي چې د امریکا او طالبانو ترمنځ تر هوکړې وروسته افغانستان تاوتریخوالی زیات شوی او هره ورځ په ګڼ شمیر کې کسان ټپيان شوي دي.

دا په داسې مهال ده چې د افغانستان لپاره د ناټو ملکي استازي پرون تازه له افغان ولسمشر محمد اشرف غني سره د لیدنې پرمهال له افغانستانه د بشپړ ملاتړ ژمنه تازه کړه.

له بله پلوه باید وویل شي چې د سولې بین الافغاني خبرې تر نامعلومې نیټې ځنډیدلي دي. دواړه لوري پر یو بل د خبرو پر وړاندې د خنډونو اچولو تورونه لګوي، خو پرون افغان حکومت پر طالبانو تور ولګاوه چې د سولې د خبرو پر وړاندې بهاني لټوي.

 

د لیکوال/ لیکوالې په اړه

بشر درویش

بشر درویش د یاران د کاري ټیم غړی دی، چې پر بیلابیلو مسلو د یاران لپاره راپورونه او مطالب چمتو کوي

تبصره مو ولیکئ