ولې د پزې د وېښتانو لرې کول زیان لري؟

ژباړه: عایشه حیدري

نن سبا ډېری خلک د ښکلا او روغتيا لرلو لپاره د خپلې پزې وېښتان باسي ځکه دوی فکر کوي چې که پزه یې ویښتان ولري بدرنگه او نامنظمه به ښکاره شي. دا منو چې د پزې د وېښتانو اوږد والی بد ښکاري او باید لرې شي، خو دا یادونه هم اړینه ده چې د پزې د وېښتانو ایستل د ښکلا د گټې ترڅنګ ځینې زیانونه هم لري. په نننۍ لیکنه کې غواړو تاسو ته د دغو زیانونو په اړه لنډ معلومات درکړو.
د لیکنې تر پایه زموږ سره ملتیا وکړئ!
پخوا به د پزې د وېښتانو لرې کولو لپاره له قیچي څخه ګټه اخیستل کېده خو نن سبا په سینگارتونونو کې د پزې د وېښتانو د لرې کولو لپاره د موم له بېلابېلو ډولونو کار اخیستل کېږي. ځینې کسان د خپلې پزې وېښته د وېښتانو ایستلو وسیلې پر مټ باسي او ځینې بیا د عصبي لاملونو لپاره عادت لري چې په خپل لاس د خپلې پزې وېښتان لرې کړي. د پزې د وېښتانو ایستلو لپاره پورتنۍ لارې مناسبې لارې نه دي او کولای شي انسان ته جدي زیانونه ورسوي.
د هر انسان پر مخ داسې ځای شتون لري چې ورته د مړينې مثلث وايي. چې له دغې ځایه وريدي او شریاني رګونه تېرېږي. او په دغو ځایونو کې ډېر رگونه واقع دي. دغه ځایونه د پزې له پل څخه پیلېږي او د خولې په شاوخوا کې پای ته رسېږي.
د پزې د يو تار وېښته ایستل کولای شي د پزې دغو حساسو برخو ته زيان ورسوي او فولیکول زیانمن کړي. او د خطرناکو مېکروبونو د ننوتلو لاره جوړه او هواره کړي. همدارنگه کېدای شي هغه مهال چې ستاسو د‌ پزې ویښتان وده کوي په پوستکي کې د ځينو ستونزو د رامنځته کېدو لامل شي.
د پزې د وېښتانو د لرې کولو لپاره تر ټولو ښه لار د قیچي په واسطه د پزې د وېښتانو کمول دي.
هېر مو نه شي که چېرې مو د پزې د ويښتانو د لرې کولو لپاره له موم، ویښته ایستونکي او یا خپل لاس څخه گټه اخیستې وي او کومه ستونزه درته پیدا شوې وي، نو ارومرو اړوند ډاکټر ته ورشئ.

Be the first to comment

Leave a Reply

Your email address will not be published.