فبروري 28, 2021

د قبرس دولت د طلایي پاسپورټونو د ورکړې پروژه ‌بندوي

راپور: عایشه حیدري

د قبرس دولت اعلان کړی چې په دغه هېواد کې د سوداګرۍ په بدل کې ترلاسه کېدونکي پاسپورټ د ورکړې پروژه‌ بنده کړه. د‌ اسپوټنیک د راپور پر بنسټ، د قبرس دولت د نوامبر له لومړۍ نېټې څخه د سوداګرۍ په بدل کې د دغه هېواد د تابعیت ورکړې پروژه، چې د طلایي پاسپورټونو په نامه مشهوره وه، بنده کړه.
د دغې پروګرام په چوکاټ کې چې د ۲۰۱۳ څخه پیل شوی و، هغه کسان چې د دغه هېواد د تابعیت د ترلاسه کولو مینه‌وال ول، کولای شول چې د دوو میلیونو یورو پانګونې پر مټ او په دغه هېواد کې د کورونو اخیستلو په بدل کې د قبرس طلایي پاسپورټ ترلاسه کړي.
د دغې پروژې په چوکاټ کې، د ۸ میلیارډه یورو څخه زیاتې پیسې د دغه هېواد د سوداګرۍ په بودجې کې زیاتې شوې. او د دغه هېواد چارواکو نږدې څلور زره طلایي پاسپورټونه (صادره) کړل.
وړاندې تر دې د روان کال په اګسټ کې، الجزیره يو راپور خپور کړی و، دغه راپور کښلي وو چې د افغانستان د ولسي جرګې مشر میر رحمان رحماني، ۲.۵ میلیون ډالره د قبرس د طلایي پاسپورټ د ترلاسه کولو په پار د قبرس دولت ته ورکړي دي.
د روان کال په اکټوبر کې د قبرس د مالیې او کورنیو چارو وزارتونو د سرغړونو او زیانمنوونکو پېښو د مخنیوي لپاره د دغه پروګرام د بندولو غوښتنه وکړه چې وروسته بیا د قبرس وزیرانو شورا هم د دغې غوښتنې ملاتړ وکړ.
د دغې پروژې د پاسپورټونو د صادرولو بهیر هغه وخت په بشپړ ډول بند شو کله چې د قطر (الجزیره) د ټلویزیوني شبکې له لوري یو څېړنیز فلم خپور شو، په دغه فلم کې داسې ښکارېده چې دغه پاسپورټونه ډېری هغو دولتي چارواکو ته چې په جرمونو تورن شوي دي صادرېږي.

لومړي کس و اوسه چې پر دې لیکنه نظر لیکي

نظر مو ولیکئ

ستاسو د ایمیل پته نه خپریږي