سپورټ کرکټ وزش او تمرین

پنجاب لوبډلې په پښتو ژبه مجیب ځدران ته ښه راغلاست ویلی + ویډيو

لیکنه: محمدصابر حمیدي

د هندوستان په آی پي ایل سیالیو کې ګډونوالې لوبډلې کینګز الیون پنجاب پر خپلې رسمي فسبوک پاڼې د افغان لوبغاړي محیب ځدران هغه ویډیو خپره کړې، چې په پښتو ژبه یې پکې خبري کړې او یادې ویډیو سره یې په پښتو ژبه لیکلي، چې ښه ښه راغلاست مجیب.

مجیب ځدران په یاده ویډیو کې له ټولو هیوادوالو غوښتي، چې کینګز الیون پنجاب لوبډلې ته د بریاوو دوعا وکړئ.

هغه زیاته کړه:

«سلامونه ټولو مینوالو ته، لکه څنګه چې تاسو ته معلومه ده آی پي ایل په دوبۍ کې شروع کېدونکی دی. ما د کینګز الیون پنجاب لوبډلې سره لومړۍ ورځ تېره کړه. له تاسو څخه هیله کوم چې کینګز الیون پنجاب لوبډله تشویق کړئ او دوعاوي ورته وکړئ.»

مجیب ځدران تازه د کینګز الیون پنجاب لوبډلې سره یوځای شوی او هغه به سږ کال هم د یادې لوبډلې سره په آی پي ایل سیالیو کې ولوبیږي.

د مجیب ترڅنګ آی پي ایل سیالیو کې محمدنبي عیسی خېل او راشدخان ارمان هم لوبیږي او اوس د حیدارباد لوبډلې سره یوځای شوي.

آی پي ایل لوبې

د هندوستان آی پي ایل سیالیو ۱۳م پړاو نن شنبه تر اوږده ځنډه وروسته پیلیږي، چې په لومړۍ لوبه کې چینای سوپر کینګز او ممبي انډینز لوبډلې یو د بل په وړاندې د سیالي ډګر ته کښته کیږي.

د ورکړل شوو معلوماتو له مخې دا لوبه نن شنبه مازدیګر ۶:۳۰ بجې د دوبۍ په شیخ زاهد کرکټ لوبغالي کې ترسره کیږي.

چینای سوپر کینګز، ډهلي کپيټلز، کینګز الیون پنجاب، کلکته نایټ رایډرز، رویال چلینجرز بنګلور، سنرایزر حیدراباد، راجستان رویالز او ممبي انډینز هغه اته لوبډلې دي، چې په آي پي ایل سیالیو کې به یو د بل په وړاندې ولوبیږي.

دا لیګ د نوومبر تر ۱۰مې نېټې پوري دوام کوي.

د لیکوال/ لیکوالې په اړه

محمد صابر حمیدي ، کندهار

محمد صابر حمیدي په کندهار کې د یاران د کاري ټیم غړی دی. نوموړی د کندهار پوهنتون د ښووني او روزنې پوهنځی د پښتو څانګې څخه فارغ شوی. په کندهار کې د ” زما“ راډیو سره په خبري برخه کې کار کوي. صابر د فوټبال لوبغاړی دی. یاران ته په سپورټي، ټولنیزو او نورو برخو کې لیکنې او مطالب چمتو کوي. په یاران کې د نوموړي د ټولو لیکنو د بیا خپرولو حق له یاران سره خوندي دی.

تبصره مو ولیکئ