غوره چانس؛ د افغانستان پر وړاندې سیالیو کې د پاکستان ۴ مهم لوبغاړي نه لوبیږي

د ایسفاین کریک انفو د راپور له مخې د افغانستان پر وړاندې راتلونکو دریو یوورځنیو لوبو کې د پاکستان ملې لوبډلې څلور مهم لوبغاړي بابراعظم، محمدرضوان، شاهین افریدي او حسن علي نه لوبیږي.

 

د یاد راپور له مخې دوی؛ ځکه نه لوبیږي، چې د خپل کرکټ بورډ څخه یې د استراحت غوښتنه کړې او بورډ هم ورته اجازه ورکړې.

 

 

راپور کې راغلې، چې محمدرضوان په یوه خبري کنفرانس کې وویل:

 

‹‹موږ په دوامداره توګه سیالۍ وکړې او اړتیا مو درلوده، چې استراحت وکړو، خوشبختانه کرکیټ بورډ زموږ دا غوښتنه ومنله. زموږ اصلي تمرکز به راتلونکی شل اوریزه نړیوال جام ته وي، ترڅو استراحت وکړو او ورته روحي او فزیکي چمتو واوسو.››

 

افغان کرکټ ملې لوبډلې د پاکستان پر وړاندې راتلونکو دریو یوورځنیو لوبو ته د چمتوالي په موخه وړمه ورځ کابل کې تمریناتي کمپ پیل کړ.

 

د افغانستان د کرکټ بورډ ویاند محمد فرید هوتک ویلې، افغان کرکټ ملې لوبډله د پاکستان پر وړاندې راتلونکو دریو نړیوالو یو ورځنیو لوبو ته پوره چمتو ده، چې د پروازونو د پیل کېدو سره سم به ډېر ژر سریلانکا هیواد ته سفر وکړي.

 

د پاکستان پر وړاندې د افغانستان راتلونکې درې سیالۍ

 

ټاکل شوې د کرکټ نړیوالې شورا د سوپرلیګ سیالیو په لړ کې افغان کرکټ ملې لوبډله درې یو ورځنۍ لوبې د پاکستان کرکټ ملې لوبډلې پر وړاندې ترسره کړي.

 

دا لوبې د روان ۲۰۲۱م کال د سیپټمبر میاشتې له درېیمې نېټې پیلیږي.

 

ددې درې سیالیو کوربتوب افغانستان ته وردغاړی دی، چې په سریلانکا هیواد کې به ترسره شي.

 

افغان کرکټ ملې لوبغاړو دې سیالیو ته د چمتوالي په موخه په دوو پړاوونو کې تمرینونو ترسره کړل او روانه اونۍ به سریلانکا ته سفر وکړي.

 

د پاکستان پر وړاندې اعلان شوې ۱۷ کسیزه افغان لوبډله

 

رحمن‌الله ګربز، ابراهیم ځدران، صدیق اتل، رحمت‌شاه، حشمت‌الله شهیدي، نجیب ځدران، ابراهیم ځدران، شاهد کمال، محمد نبي، کریم جنت، عضمت‌ عمرزی، راشدخان، عبدالرحمن، نوین‌الحق، مجیب ځدران، فضل‌حق فاروقي او نوراحمد لکڼوال.

 

احتیاطي لوبغاړي: یوسف ځاځی، سلیم صافی، شراف الدین اشرف او قیس احمد.

 

د یادې لوبډلې تر اعلان څو ورځې وروسته، حضرت الله ځاځی او نورعلي ځدران هم لوبډلې ته وراضافه شول.

 

 

 

وروستي مطالب