د شاعر او ليکوال عرفات پردېس دوه تازه نثري ټولګې د چاپ په ګاڼه سينګار شوې

راپور: محمد عزيز پردېس
د افغانستان د شمال ختيځ زون مخکښ او پياوړي ليکوال عرفات پردېس دوه نثري ټولګې (له حرمه تر حرمه) او ( داوود خان او ملاقُلي ) تازه په تازه په کابل کې د رحماني خپرندويې ټولنې لخوا په خورا ښه کيفيت سره چاپ او د ادب بازار ته راووتې.
لومړی کتاب (له حرمه ترحرمه) د ليکوال په هغه تاريخي سفر راڅرښي چې نوموړي له مکې مکرمې څخه تر مدينې منورې پورې په پلي توګه د لسو ورځو په ترڅ کې ترسره کړ او ډېر خلک يې حيران کړل. ليکوال ياد حيرانوونکي سفر ته د افغانستان د حج او اقافو وزارت او په سعودي کې د کعبې شريفې ملا امام قاري عبدالرحمن سديس له اجازه ليک او تفاهم څخه وروسته د خپل مل ملګري ګل نبي محمدي سره وروسته له دې چې د عمرې مراسم يې اداکړل، ملا وتړله.
پر ياد کتاب د هېواد تکړه او پياوړو علماوو سريزې ليکلي او کتاب يې په هراړخيزه توګه ارزولی دی.

د کتابونو ليکوال، عرفات پردېس

دويم کتاب (داوودخان او ملاقُلي) دی. ياد کتاب په دوو برخو وېشل شوی دی: لومړۍ برخه يې رښتيني کيسې، هغه شفاهي روايات او پندناکه ژباړې دي چې ليکوال له مختلفو سرچينو څخه راټول کړي دي او دويمه برخه د خاطرو او يادښتونو په بڼه دي چې د افغانانو په هغه ناخوالو راڅرخي چې ليکوال په خپلو سترګو ليدلي او د هېواد دننه او بهرنيو هېوادونو کې ورسره  مخ شوی دی. د دې کتاب په هکله د د افغانستان د علومو اکاډمۍ رئيس استاد ظاهر شکېب او د کندز پوهنتون د پښتو څانګې آمر او استاد، عبدالمجيد پردېس سريزې ليکلي دي او ارزولی يې دی.
دواړه کتابونه په ساده، سليسه او روانه ژبه کښل شوي دي، چې د ټولنې هرې طبقې لپاره مناسب دي او مطلب ترې اخېستی شي.
د يادونې وړ ده چې، له دې څخه وړاندې د ليکوال دوه شعري ټولګې ( د هجرت ورځې ) او ( توشېح اشعار ) هم چاپ شوي دي او په نثري برخه کې يې دا لومړی هڅه ده.
هېره دې نه وي چې ياد کتابونه په کندز کې د پردېس کلتوري او ادبي ټولنې په هڅو او زيار چاپ شوي او تمه ده چې په کابل او کندز کې د يو لړ شانداره مراسمو به ترڅ کې مخکتنې ته وړاندې شي.

له دغو لارو چارو ګټه واخلئ او مه پرېږدئ چې مقابل لوری درته دروغ ووايي!

لیکوال: عایشه حیدري ، کابل - برخه : ځوانان او زده کړې

څېړونکي وايي چې شاوخوا ۶۰ سلنه خلک کابو لس دقیقې هم له دروغ ویلو پرته نه شي تېرولای. نو د دغو شمېرو له مخې کولای شو ووايو چې زموږ د شاوخوا خلک د ورځې په ... نور ولولئ