نوین‌الحق: شل اوریزه لوبو کې قوي ټیم یو، د نړۍ هره لوبډله ماتولای شو

د افغانستان د کرکټ ملې لوبډلې تېز توپ‌اچونکي نوین‌الحق د امریکا غږ اشنا راډیو سره په یوې ځانګړې مرکه کې ویلې افغان کرکټ ملې لوبډله په شل اوریزه سیالیو کې قوي لوبډله ده او په خبره یې کولای شو، د نړۍ هرې لوبډلې ته ماتې ورکړو.

نوین‌الحق په یاده مرکه کې ویلې، راتلونکې شل اوریزه نړیوال جام کې به مو لومړنۍ هڅه دا وي، چې د ګروپ لوبې وګټو او دویم پړاو ته لاره پيداکړو.

 

د امریکا غږ اشنا راډیو سره د نوین‌الحق د مرکې مهمي خبري

 

۱ـ د انګلستان ویټالټي بلاسټ سیالۍ د نورو هیوادونو له لیګونو څخه مختلفې دي، دلته خورا مهم لوبغاړي لوبیږي او زما لپاره یوه لویه تجربه ده.

۲ـ له مینوالو پرته کرکټ هیڅ خوند نه درلود، اوس په ویټالټي بلاسټ سیالیو کې ۳۰ سلنه نندارچیانو ته اجازه ده، ترڅو لوبغالي ته راسي او لوبې له نژدې وګوري.

۳ـ په کابل کې د افغان ملې لوبغاړو تمریناتي کمپ خورا په ښه ډول روان دی او لوبغاړي په هره برخه کي خورا په مسلکي ډول روزل کیږي. ددې تمریناتي کمپ موخه د پاکستان پر وړاندې راتلونکو سیالیو ته او راتلونکي نړیوال جام ته چمتوالی نیول دي.

۴ـ زموږ لوبډله اوس ډېره قوي ده، موږ اوس باید هغه فکر ونه کړو، چې یوازې باید تکړه ټیمونو سره ولوبیږو؛ بلکې د ماتې ورکولو په موخه باید ورسره ولوبیږو او زموږ لوبډله په شل اوریزه سیالیو کې خورا قوي ده، چې کولای سو د نړۍ هر ډول لوبډلې ته ماتې ورکړو.

۵ـ د پاکستان پر وړاندې راتلونکې سیالۍ موږ ته خورا مهمي دي. د پاکستان سره لوبېدل راته یو بل ډول احساس راکوي. زه په خپلو لوبغاړو باور لرم، لکه څنګه چې مورو نورو هیوادونو سره ښې سیالۍ وکړې، پاکستان سره به هم ښې لوبې وکړو.

 

د کرکټ شل اوریزه نړیوال جام راتلونکی پړاو

 

ټاکل شوې وه د ۲۰۲۰م کال د کرکټ شل اوریزه نړیوال جام د هند په کوربتوب ترسره شوی وای، خو د کورونا له امله وځنډول شو او اوس به د یاد هیواد پرځای په متحده عربي اماراتو کې ترسره شي.

د کرکټ شل اوریزه نړیوال جام به د روان ۲۰۲۱م کال د اکتوبر میاشتې له ۱۷مې بیا د نوومبر میاشتې تر ۱۴مې نېټې پورې ترسره شي.

دا لوبې به د متحده عربي اماراتو په دوبۍ، ابوظبۍ او شارجه ښارونو کې ترسره شي.

 

د راتلونکي شل اوریزه نړیوال جام په اړه معلومات

 

راتلونکی شل اوریزه نړیوال جام په دوو پړاونو کې ترسره کیږي، چې په لومړي پړاو کې به بنګله دېش، سریلانکا، عُمان، پاپو نګیني، ایرلینډ، هالنډ، سکټالنډ او نیمیبیا هیوادونه په خپلو منځونو کې ۱۲ لوبې د عُمان هیواد په کوربتوب له ټاکل شوې نیټې مخکې ترسره کړي او څلور مخکښې لوبډلې به یې د ۱۲ لوبډلو غوره پړاو ته لاره پیداکړي.

افغانستان، هند، پاکستان، انګلينډ، ويسټ انډيز، سويلي افريقا، آسټراليا او نيوزيلينډ هغه اته لوبډلې دي، چې وار له مخې یې ۱۲ غوره لوبډلو ته لاره پیداکړې.

له هغه وروسته د اکتوبر میاشتې له ۱۷مې نېټې څخه بیا د نوومبر میاشتې تر ۱۴مي نېټې پوري د ۱۲ غوره لوبډلو ترمنځ په دوو ګرپونو کښي د کرکټ شل اوریزه نړیوال ترسره کیږي، چې هره لوبډله به په خپل ګروپ کښي پنځه ـ پنځه سیالۍ ولري.

د معلوماتو له مخې د هر ګروپ څخه به دوې ـ دوې مخکښي لوبډلې بل پړاو ته لاره پيداکړي، چې لومړی د څلورو لوبډلو ترمنځ دوې نیمه پایلوبې او له هغه وروسته به بیا د نوومبر میاشتې په ۱۴مه نېټه د دوو لوبډلو ترمنځ د شل اوریزه نړیوال جام پایلوبه ترسره شي.

 

نړیوال جام کې د افغانستان لوبې

 

لومړی ګروپ: اسټرالیا، نیوزیلنډ، ویسټ انډیز، پاکستان

دویم ګروپ: انګلستان، هندوستان، سویلي افریقا، افغانستان

دا هغه اته لوبډلې دي، چي وار له مخې یې نړیوال جام ته لاره پیداکړې، خو په لومړي پړاو کي تر نړیوال جام مخکې سریلانکا، ایرلینډ، پاپو نګیني، عُمان، بنګله دېش، ندرلینډ، سکاټلنډ او نیمیبیا هغه اته لوبډلې دي، چې وبه لوبیږي او د دوی څخه به څلور مخکښي لوبډلې د نړیوال جام په لومړي او دویم ګروپ کي ځای پر ځای کړل شي.

په همدې اساس افغانستان په دویم ګروپ کې له انګلستان، سویلي افریقا، هندوستان سره لوبیږي او ددې ترڅنګ په لومړي پړاو کي دې ګروپ ته ورپېژندل شویو دوو لوبډلو سره به ولوبیږي.

 

فرید هوتک؛ د پاکستان پر وړاندې اعلان شوي نوملړ سره ۸۵ سلنه افغانان موافق دي

by سمیع الله درانی in سپورټ

  د کرکټ بورډ ویاند فرید هوتک په خپله فیسبوکپاڼه لیکلي، چې د پاکستان پر وړاندې درېیوو یو ورځنیو لوبو ته له اعلان شوې لوبډلې ۸۵ سلنه هېوادوال راضي دي او یاده لوبډله یې وړ ... نور ولولئ