سپورټ کرکټ وزش او تمرین

میس‌عینک د ۱۳۱ منډو په توپير امو لوبډلې ته ماتې ورکړه

لیکنه: محمدصابر حمیدي

د شپږیزه کرکټ لیګ ۱۳مه لوبه د شنبې په ورځ ماپښین د میس‌عینک او امونهنګانو کرکټ لوبډلو ترمنځ ترسره شوه، چې پکې میس‌عینک لوبډلې د ۱۳۱ منډو په توپير امونهنګانو ته سخته ماتې ورکړه.

په یاده لوبه کې د میس‌عینک لوبډلې سکواډ

شاپورځدران لوبډلمشر، شهزاد محمدي، نورحمد لکڼوال، عبدالرحمن، بهار علي شینواری، صدیق‌الله پاچا، دولت ځدران، غمی ځدران، شاهدالله کمال، هشمت‌الله شهیدي او عبدالله عادل.

د امونهنګانو لوبډلې سکواډ

لوبډلمشر دروېش رسولي، جمعه ګل، قسیم اوریاخېل، جنت ګل، امان‌الله رفیقي، افتاب عالم، یوسف ځاځی، شېر شیرزی، ویس نوري او یحی خان.

د یادي لوبې حال

د امونهنګانو لوبډلې لوبډلمشر دروېش رسولي د میس‌عینک د لوبډلې لوبډلمشر شاپور ځدران څخه د لوبې پچه وګټله او د توپ اچونې پرېکړه یې وکړه.

میس‌عینک لوبډلې د لوبې په ټاکلو شلو اورونو کې د پنځو لوبغاړو په سوځېدو سره امونهنګانو لوبډلې ته د ۱۹۳ منډو هدف وټاکی.

د میس‌عینک لپاره حشمت‌الله شهیدي ۸۲ ناسوځېدلې او بهار علي شینواري ۵۷ منډې جوړې کړې.

د امونهنګانو لوبډلې لپاره بیا فریداحمد دوې، یوسف ځاځي، جمعه ګل او عبدالوسع بیا یوه ـ یوه ویکټه واخیستله.

کله چې امونهنګانو لوبډله د هدف پوره کولو لپاره میدان ته کښته شوه، نو د میس‌عینک له لوري ورکړل شوی هدف یې نه کړ پوره؛ بلکې امو لوبډله ټوله د لوبې په ۱۲ اورونو کې یوازې د ۶۲ منډو په کولو سره وسوځېده او په ستر توپير یې ماتې وخوړه.

د میس‌عینک لپاره دولت ځدران پنځه، نورحمدحمد لکڼوال دوې، شاهدالله کمال، عبدالرحمن او عبدالباقي بیا یوه ـ یوه ویکټه واخیستله.

په یاده لوبه کې جایزه ګټونکي لوبغاړي

د لوبې د غوره لوبغاړي جایزه هشمت الله شهیدي ته ورکړل شوه، چې د خپلې لوبډلې لپاره یې ۸۲ ناسوځېدلې منډې جوړې کړې.

د ډېرو شپږیزو وهونکي لوبغاړي جایزه بهار علي شینواري ته ورکړل شوه.

او د لوبې د سټایلش لوبغاړي جایزه بیا دولت ځدران خپله کړه.

د میس‌عینک او امو لوبډلو لوبو ته کتنه

په شپږیزه کرکټ لیګ کې دا د میس‌عینک شپږمه لوبه وه، چې له ډلې یې درې ګټلې، خو دوې یې بیا بایللې دي.

میس‌عینک اوس ۶ نمرې لري.

د امونهنګان لوبډلې بیا دا څلورمه لوبه وه، چې تر اوسه یې د یادو لوبو له ډلې یوه هم نه ده ګټلې او تر ټولو لوبډلو وروسته د جدول په وروستي ځای کې شتون لري.

د یکشنبې د ورځې لوبې

د یکشنبې په ورځ سهار ۹ بجې د شپږیزه کرکټ لیګ ۱۴مه لوبه د کابل بازانو او سپین غر لوبډلو ترمنځ او ماپښين ۱:۳۰ بجه بیا د امونهنګانو او بُست لوبډلو ترمنځ ترسره کیږي.

 

د لیکوال/ لیکوالې په اړه

محمد صابر حمیدي ، کندهار

محمد صابر حمیدي په کندهار کې د یاران د کاري ټیم غړی دی. نوموړی پر دې سربیره د کندهار پوهنتون د ښووني او روزنې پوهنځی د پښتو څانګې د څلورم کال محصل دی او د ” زما“ راډیو خبري برخه کې کار کوي. صابر د فوټبال لوبغاړی دی. یاران ته په سپورټي، ټولنیزو او نورو برخو کې لیکنې او مطالب چمتو کوي. په یاران کې د نوموړي د ټولو لیکنو د بیا خپرولو حق له یاران سره خوندي دی.

تبصره مو ولیکئ