افغانستان سرسکالو سوله سیاست

ولسمشرغني: د مخامخ مذاکراتو په اړه توافق شوی؛ ۴۰ کلنه غمیزه پای مومي

لیکنه: غازي عابد
  • راپور: غازي عابد

افغان ولسمشر محمدا شرف غني نن د ملي شوار ۱۷مې تقنینې دورې د دویم کال پرانیسته.

هغه په دې مراسمو کې وینا وکړه. اجرایه رییس عبدالله عبدالله، د ملي شورا مشران او غړي او د کابینې یو شمیر وزیرانو هم په دې مراسمو کې ګډوند درلود.

افغانستان پخوانی نه دی !

ولسمشر اشرف غني وویل د افغانستان اوسنی ولس نه د تېرو ۹۰ کالو ولس دی او نه هم د تېرو څلوېښتو کالو، بلکې ژوندی، پوه، ژمن او د پرمختګ غوښتونکی دی.

هغه وویل:

«پر مساوات او حقونو باندې ټینګه ټولنه لرو، موږ به انشاالله تعالی ملي وحدت، اتفاق، ارادې او برنامو باندې باثباته نظام او هوسا ټولنې ته ورسېږو.»

د څلویښت کلنې غمیزې پای

ښاغلی غني وايي، د تاریخ په پړاوو کې موږ د یووالي اونفاق دوه حالته لیدلي دي. کله چې موږ د وحدت په صف کې درېدلي یوو، لویې کارنامې مو کړې دي او د نفاق په حالت کې برعکس ډېرې وړې ستونزې په لویو فاجعو بدلې شوې دي.

هغه زیاته کړه:

«نن چې د څلوېښت کالو تاوتریخوالي د پایته رسېدو فرصت برابر شوی دی، نو ملي وفاق ته اړتیا لرو. د پخوا برخلاف زموږ ملي وثیقه زموږ د وفاق تګلاره ښیي.»

د خلکو استازي دې چمتو وي

هغه د ولسي جرګې وکیلانو او خلکو ته په خطاب کې وویل:

«موږ د سولې په برخه کې حساس ځای ته رسېدلي یوو او د خلکو غوښتنه دا ده چې ټول یو ځای او په یو غږ پرمخ ولاړ شو. اړتیا دا ده چې د خلکو محترم استازي هماغسې چې د خلکو په مشورو او انسجام کې خپل نقش لوبولی د سولې په مذاکراتو کې وروستیو مشورو او فیصلو ته هم اماده واؤسي.»

سیاسي او ټولنیز چوکاټونه او واحد صف

ولسمشر غني د سولې خبرو ته په اشارې سره وویل چې د افغانستان د اوسني مقام د ساتلو لپاره اړتیا ده چې ټول ټولنیز او سیاسي چوکاټونه په یوه واحد صف کې ودرېږو او د سولې په نوي مسیر کې متحدانه پر مخ ولاړ شو. د سولې په اړه د افغانستان حکومت ټول تصامیم د مشورو پر اساس و او وي به.

د مذاکراتو توافق

ولسمشر غني وویل:

«د افغانستان دولت د امریکا متحدو ایالتونو او طالبانو ترمنځ د توافق نامې هغه برخې چې تاوتریخوالی او بالاخره دایمي اوربند ته په کې اشاره شوې ده، همدارانګه د افغانستان د اسلامي جمهوریت او طالبانو ترمنځ د مخامخ مذاکراتو د پیل په اړه توافق شوی دی. د دې دواړو هرکلی کوو.»

امریکا سره مشترکې ګټې

غني وویل:

«زموږ روابط نړیوالې ټولنې خصوصاً د امریکا متحدو ایالتونو سره په متقابل احترام او د مشترکو ګټو پر بنسټ ولاړې دي. د افغانستان د اسلامي جمهوریت او د ناټو سازمان ترمنځ او دغه راز د امریکا متحدو ایالتونو سره زموږ دوه اړخیز امنیتي تړونونه پر ځای دي.»

ولسمشر غني په داسې حال کې د سولې او بین الافغاني مذاکراتو په اړه بیا یادونه کوي چې ویل کیږي د پنځه زره طالب بندیانو نه خوشي کول به ددې مذاکراتو د ځنډ سبب شي.

همداراز تیره شپه هم د افغانستان د سولې لپاره د امریکا د بهرنیو چارو وزارت استازي زلمي خلیلزاد له افغان ولسمشر سره لیدلي او پر یو شمیر مسایلو یې سره خبرې کړي دي.

 

 

 

Advertisements

د لیکوال/ لیکوالې په اړه

غازي عابد

تبصره مو ولیکئ