سپورټ فوټبال وزش او تمرین

د میسي لیدلو ته راغلی وو؛ خو ناهیلی ولاړ

لیکنه: محمدصابر حمیدي

پرون د بارسلونا فوټبال لوبډلې مسوولینو او لوبغاړو د کورونا ټیسټونه ورکړل، چې د میسي پرته د بارسلونا یو شمېر لوبغاړي ټیسټ ورکولو ته تللي وه.

د نورو مینوالو ترڅنګ یو ماشوم د لوبغاړو مخې ته راغلی وو، تر څو میسي له نژدې وګوري او هغه ادعاوي درواغ ثابتې کړي، چې میسې له لوبډلې جلا کیږي.

پر ټولنیزو رسنیو د یوه ماشوم انځورونه ډېر لاس پر لاس شوي، د میسي لباس یې په تن دی او د میسي سرخت سیال دی، چې د میسي بیا راتلو ته یې شیبې شمارلې، خو میسي لا تراوسه بارسلونا ته نه دی راګرځېدلی.

د نړۍ نوموتي فوټبالر میسي په چمپېنزلیګ سیالیو کې تر اوټېدلو وروسته د کلب مسوولینو ته یو لیک استولی او په یاد لیک کې یې د لوبډلې نه د جلاکېدو غوښتنه کړې وه.

خو بارسلونا کلب نه غواړي میسي دي له لوبډلې څخه جلا شي.

لیونل میسي د بارسلونا لوبډلې په استازیتوب ۱۷ کاله لوبېدلی دی، خو اوس په داسې حالت کې غواړي له لوبډلې ووځي چې د بورډ له عمومي مشر او ځینو غړو څخه ناخوښ دی.

میسي د بارسلونا لپاره له ۷۰۰ زیاتې لوبې ترسره کړې دي او د یادې لوبډلې لپاره یې ۶۳۴ ګولوهنې ترسره کړې دي.

د فوټبال په نړۍ کي میسي تر هر فوټبالر زیات ریکارډونه له ځان سره لري، چي نامتو یې ۶ د سرو زرو توپونه ترلاسه کول او ۶ د سرو زرو بوټان ترلاسه کول دي.

اوس زیاتې لوبډلې هڅه کوي، چې میسي له خپلې لوبډلې سره یوځای کړي.

د لیکوال/ لیکوالې په اړه

محمد صابر حمیدي ، کندهار

محمد صابر حمیدي په کندهار کې د یاران د کاري ټیم غړی دی. نوموړی پر دې سربیره د کندهار پوهنتون د ښووني او روزنې پوهنځی د پښتو څانګې د څلورم کال محصل دی او د ” زما“ راډیو خبري برخه کې کار کوي. صابر د فوټبال لوبغاړی دی. یاران ته په سپورټي، ټولنیزو او نورو برخو کې لیکنې او مطالب چمتو کوي. په یاران کې د نوموړي د ټولو لیکنو د بیا خپرولو حق له یاران سره خوندي دی.

تبصره مو ولیکئ