افغانستان انتخابات سیاست

عبدالرشید دوستم رسماً د افغانستان درېیم مارشال شو!

د ملي جنبش ګوند مشر عبدالرشید دوستم ته نن چهارشنبه په رسمي توګه د مارشالۍ رتبه په جوزجان ولایت کې ورکړل شوه.

هغه مراسم چې نن په جوزجان کې جوړ شوي وه په ترڅ کې یې عبدالرشید دوستم ته د مارشالۍ مډال ورکړل شو.

دې مراسمو کې د ملي مصالحې عالي شورا رییس عبدالله عبدالله او ځینو سیاسي څېرو ګډون کړی وو.

د ولسمشر غني د دفتر رییس شاکر ګارګر عبدالرشید دوستم ته د مارشالۍ رتبې د ورکړې فرمان ولوست.

په فرمان کې راغلې:

«د هیواد سیاسي شخصیت عبدالرشید دوستم ته هیواد کې د سیاسي بندون هواري، ثبات او تامین، او خدمتونو لپاره د مارشالۍ رتبه اعطا کوم.»

عبدالرشید دوستم په تېرو دوو لسیزو کې دویم او د هیواد په تاریخ کې درېیم مارشال اعلان شو.

په هیواد کې د لومړي ځل لپار سردار شاه ولي خان ته د مارشالۍ رتبه ورکړل شوې وه او دوهم ځل بیا د پخواني ولسمشر حامد کرزي په وخت کې محمد قسیم فهیم ته د مارشالۍ رتبه ورکول شوه.

د ولسمشر محمد اشرف غني او عبدالله عبدالله تر سیاسي هوکړې وروسته د عبدالله عبدالله په غوښتنه جنرال عبدالرشید دوستم ته د مارشالۍ رتبه ورکړل شوه.

ښاغلی دوستم د ۲۰۱۴م څخه بیا د ۲۰۲۰م تر لومړیو پورې د ولسمشر اشرف غني لومړی مرستیال وو.

د لیکوال/ لیکوالې په اړه

محمد صابر حمیدي ، کندهار

محمد صابر حمیدي په کندهار کې د یاران د کاري ټیم غړی دی. نوموړی پر دې سربیره د کندهار پوهنتون د ښووني او روزنې پوهنځی د پښتو څانګې د څلورم کال محصل دی او د ” زما“ راډیو خبري برخه کې کار کوي. صابر د فوټبال لوبغاړی دی. یاران ته په سپورټي، ټولنیزو او نورو برخو کې لیکنې او مطالب چمتو کوي. په یاران کې د نوموړي د ټولو لیکنو د بیا خپرولو حق له یاران سره خوندي دی.

تبصره مو ولیکئ