مارچ 5, 2021

مهال واک د ویر په کوڅو کې د ژوند لټون کوي

د رڼا لودين لیکنه
د کابل کوڅې که پرلپسې د چاودونو، وژنو او تښتونې شاهدانې دي، خو ددې ښار په همدې ویرجنو کوڅو کې د ژوند لټون هم دوام لري.
که ددې ټولنې یوه ډلې خلکو په ځانګړي توګه سړیو، د وژنو کاروبار ته زور ورکړی، خو یوه لویه ډله ځوانان داسې هم شته چې غواړي ژوند وکړي او د نورو د ژوند د بهبود لپاره د زده کړو، هنر او نورو ټولنیزو فعالیتونو له لارې هڅې کوې. په دې برخه کې په خاص ډول د نجونو فعالیتونه ډیره هیله بښونکي دي.
دا ډله نجونې ددې ټولنې ريښتیني اتلاني دي. دوی په ډیرو سختو ټولنیز او امنیتي شرایطو کې لوی خطرونه پر سر اخلي او د ټولنې د یو روښانه راتلونکې لپاره کار کوي.

ځوانه افغان ممثله، ماډله او ټولنیزه فعاله مهال واک له همدې ډلې ده. هغه چې د ” خط سوم “ په نوم افغاني سیریال کې یې مخکښ رول لوبولی او له تیرو دوو کلونو راهېسې یې نورو سینمايي او هنري پروژو کې هم کار کړی، وايي فکر کوي چې د سینما له لارې خپل پیغام په ښه توګه خلکو ته رسولی شي.

مهال واک له تیرو دوو کلونو راهېسې پر تمثیل سربېره ماډلینک هم کوي.

په امریکا غږ اشنا راډیو کې د نوشابې اشنا یوه مرکه مې له دې ځوانې افغان ممثلې سره واوریده، چې په کې د یوې روښانه ټولنې لپاره د یوې بادرکه افغانې پیغلې هیلې له ورایه احساسیږي.
د ډیرو په باور په افغاني ټولنه کې د ښځو لپاره په سینمايي هنر کې کار کول ستونزمن دي، خو په دې مرکه مې د مهال واک دا خبره خوښه شوه چې وايي ”په افغانستان کې یوازې سینمايي هنر او ماډلینګ ته د ښځو راتګ ستونزمن نه دی. بلکې زه چې ګورم دلته په هره برخه کې د ښځو لپاره کار ستونزمن دی. “

د نوموړې په وینا که غواړو ټولنه د ښځو او نجونو له زده کړو او کار سره عادت کړو باید په قوي ارادې او جرات مخکې ولاړ شو.
مهال واک په دې مرکې کې د خپلې کورنۍ په اړه وايي چې په پیل کې یې هغوی هم ډیر ملاتړي نه وو چې د سینمايي هنر او ماډلینګ لاره دې خپله کړي. خو کله یې چې ددې ښه کار او په دې برخه کې د کارکولو مثبت ټکي درک کړل نو مشکلات یې تر ډیره راکم شول.
هغې په ” خط سوم “ سریال کې د خپل کار کولو یادونه وکړه. ددې سریال داستان په افغاني ټولنه کې د نجونو د زده کړو او کار په وړاندې پر ستونزو او په وړاندې یې په ټولنه کې په پرتو خنډونو راڅرخي.
خط سوم افغاني سیریال په ټولنه کې د افغان نجونو د زده کړو او کار په وړاندې پر پرتو ستونزو راڅرخي.

مهال واک وايي، که دې سریال کې ددې کارکولو په ټولنه کې د نجونو د زده کړو په اړه ډير کم هم د خلکو فکر بدل کړی وي. دا یوه لاس ته راوړنه ده.
مهال واک له امریکا غږ اشنا سره په دې مرکې کې ویلي ” د خلکو منفي فکرونه مې د هنري کار په وړاندې یوازینی خنډ دی.“ خو زیاتوي چې د هرې ورځې په تیریدو یې د کار په اړه د خلکو مثبت نظرونه زیاتیږي او منفي نظرونه کمیږي.

افغاني رسنیو په ځانګړې توګه تلویزوني شبکو د سیاسي بحثونو او ګردي میزونو په نوم تر ډيره په ټولنه کې د کرکې د خپرولو دوکانونه پرانیستي. دوی د هنر په ځانګړ توګه افغاني هنر او د هنر له لارې د اجتماعي ښیرښیګڼې کار ته کمه او یا هیڅ پاملرنه کوي.
د هغې ورځې په هیله چې د افغانستان تلویزوني چینلونه په ځانګړې توګه هغه چې ځانونه پښتو ټلویزوني چینلونه بولي، د تشو ناندرو او بحثونو پر ځای، هنري او کلتوري اړخ ته پاملرنه وکړي چې په کې نه یوازې د مهال واک په څیر استعدادونه خپلې وړتیاوې وغوړوي، بلکې د هنر په نرمه او موثره ژبه هڅه وکړي چې ولس له روانو سیاسي او ټولنیزو تیارو څخه د یو روښانه سباوون پر لور روان کړي.
له امریکا غږ اشنا سره د مهال واک مرکه له دې ځایه اوریدای شئ.