مارچ 4, 2021

د لوګر بڼوالو او بزګرانو سره د ۲۲۶ پروژو تړونونه لاسلیک شول

راپور: بشر درویش
لوګر کې د بڼوالۍ ځنځیري ارزښت د پراختیا د ۲۲۶ پروژو تړونونه ددې ولایت د کرنې، اوبولګولو او مالدارۍ ریاست، د بڼوالۍ د ځنځیري ارزښت د پراختیا سکټوري پروژې او له دغو بنسټونو څخه د لوګر ولایت د برخمن شویو بزګرانو او بڼوالو ترمنځ لاسلیک شول.
د لوګر ولایت د کرنې، اوبولګولو او مالدارۍ رییس عبدالله تسل وایي، چې ددې هوکړې پر بنسټ، د بڼوالۍ د ځنځیري ارزښت د ودې او د بزګرانو د اقتصادي ودې په پار، د لوګر ولایت د مرکز په ګډون ددې ولایت د محمدآغې، څرخ او خوښي په ولسوالیو کې د ۱۲۱ میلیونه او ۹۰۰ زره او ۱۴۳ افغانیو په ارزښت ۲۲۶ پروژې پلي کیږي، چې په کې د پیازو او کچالو صفر انرژۍ زېرمتونونه او ممیزخونې جوړول او د مېوو او سبو د وچولو ماشینونه شامل دي.

د کرنې وزارت یوه خبرپاڼه کې د ښاغلی تسل له قوله لیکلي:

«د یادو پروژو له لارې د لوګر ولایت په مرکز او ددې ولایت په محمدآغې، څرڅ او خوښي ولسوالیو کې د کچالو ۷۹ صفر انرژۍ سړې خونې، د پیازو۹۱ صفر انرژۍ سړې خونې او ۲۸ ممیزخونې جوړیږي، دغه راز ددې ترڅنګ په یادو سیمو کې پر یوشمېر بزګرانو د رومیانو او زردالو وچولو ۲۸ دستګاوې هم وېشل کیږي.»

تائید شوې طرحه

یاد وزارت ویلي؛ تر دې وړاندې د کرنې، اوبولګولو او مالدارۍ وزارت له خوا د کرنیزو محصولاتو د مدیریت برنامه طرحه، د عالي اقتصادي شورا له خوا تایید او د هېواد ولسمشر محمداشرف غني له خو منظور شوې وه.
ویل شوي؛ تر اوسه د کرنیزو محصولاتو د مدیریت د برنامې پروژې، د هېواد په ۳۴ ولایتونو کې د پلي کېدو په حال کې دي.
یاد وزارت زیاته کړې؛ ددې برنامې په اډانه کې د کرنې وزارت په ۹۰ سلنه ونډې سره بزګرانو ته زرګونه ممیزخونې، د پیازو زرګونه زېرمتونونه، د کچالو زرګونه زېرمتونونه او دسارک سلګونه سړې خونې جوړیږي. دغه راز پر زرو بڼوالو د مېوو وچوونکې ماشینونه هم وېشل کیږي.

د کرنیزو محصولاتو د مدیریت د برنامې د پروژو په پلي کولو سره لسګونه زره کسانوته لنډ مهالې دندې او په زرهاوو کسانو ته د تلپاتې دندې زمینه برابریږي.
ویل شوي؛ د کرنې وزارت دغه پروژې په داسې حال کې پلی کیږي، چې د کرونا ویروس د خپرېدو له امله د کاروبار کچه ټېټه شوې ده، خو د کرنې وزارت د یادو پروژ پلي کېدو سره، چې بڼوالو او بزګرانو ته په کې بنسټیز زېربناوې جوړیږي، په کلیو او بانډو کې تر یوه کچه د اوزګارتیا ستونزه هواره کړې ده.

لومړي کس و اوسه چې پر دې لیکنه نظر لیکي

نظر مو ولیکئ

ستاسو د ایمیل پته نه خپریږي




وروستي مطالب

جلال ابا کې چاودنې یوه ډاکټره ووژله

لیکوال: عاقله اسد - برخه : افغانستان

د راپورونو له مخې، نن سهار د جلال اباد ښار په درېيمه ناحیه کې ماین چاودنې د دې ولایت د حوزوي روغتون یوه ډاکټره وژلې ده. د والي ویاند عطاالله خوګیاڼی وايي پېښه د پاکستان ... نور ولولئ