لسیت ملینګا له یوه ورځینیو لوبو سره مخه ښه کوي

د خپریدو وخت: جولای 23, 2019

بهار سمسور - خوست

لیکنه: بهار سمسور
د سریلنکا پیاوړی چټک توپ اچونکی او د ځانګړي توپ اچونې انداز خاوند لسیت ملینګا په خپل کوربه توب د بنګلادېش خلاف د یوه ورځینیو لوبو د سیریز په لومړۍ لوبه کې له همدې فارمټ څخه استعفا کوي.
دا خبر ملینګا په خپله رسنیو ته تاید کړی او هم سریلنکایي نوي لوبډلمشر ډیمرت کرنرتني د نومړي د استعفا خبر تأید کړی دی.

سریلنکایي لوبډلمشر ویلي؛ ملینګا به د سیریز له لومړۍ لوبې وروسته زموږ سره نه وي، دا زموږ لپاره د خفګان وړ خبر هم دی، موږ د ملینګا په شان بل توپ اچونکی نه لرو، هڅه به وکړو چې د نوموړي په شان ویکټ اخیستونکی توپ اچونکی له ځان سره ولرو.
ملینګا د څلورو هغو توپ اچونکو په لېست کې قرار لري،چې په نړیوال جام کې یې پنځوس ویکټې پوره کړي دي.
نوموړی چې د توپ اچونې ځانګړی انداز(سټایل)لري په نړیواله کچه زیات مینوال هم لري. ملینګا نه یوازې د خپل هېواد ملي لوبډلې لپاره یو پیاوړی لوبغاړی دی، بلکې په تجارتي لیګونو کې هم له زیاتو لوبډلو سره لوبیدلی او ځلیدلی دی.
ده د سریلنکا لپاره په ۲۲۵ یوه ورځینیو لوبو کې ۳۳۵ ویکټې تر لاسه کړي دي، چې وروستۍ یوه ورځینۍ ۲۲۶ لوبه به د راتلونکي جمعې په ورځ د بنګلادېش خلاف تر سره کړي.

د معلوماتو له مخې ملینګا به تر راتلونکي شل اوریز نړیوال جام پورې د شل اورونو په فارمټ کې د سریلنکا لپاره ولوبیږي او بیا به له نړیوال کریکټ له ټېسټ،یوه ورځینیو لوبو وروسته دا د کمو اورونو شل اوریز فارمټ هم پریږدي،خو د تجارتي لوبو سره به تر ډېره پاتې وي.
وروسته له هغې چې کمار سنګاکارا ،تلکرتني دلشن،ماهیلا جاوردانا له ملي او نړیوال کریکټ سره رخصت واخیست، د سریلنکا لوبډله له بدو بتر حالت ته رسیدلې، چې د ملینګا استعفا د دې لوبډلې لپاره یو بل ګزار دی.