د انګلستان پخوانۍ مستعمره؛ پاکستان!
دغه هېواد، چې مخالفین یې په سیمه کې د انګلیسانو په لاس جوړه شوې سرطاني دانه ګڼي، تراوسه د خپل اصلي لارښود (انګلستان) په پيروۍ روان دی.
د پاکستان د اساسي قانون له مخې د دغه هېواد رسمي ژبه انګلیسي، خو ملي ژبه اردو ده.
په همدې دلیل د پاکستان په ډېرو ادارو کې رسمي ژبه انګلیسي ده.
هلته قوانین هم ترډېره د انګلیسانو په لاس جوړ شوي، ځکه خو د پاکستان مخالفین پاکستان په سیمه کې د انګریزي امپراتورۍ یوازینی ژمن او لاس په نامه ولاړ وارث ګڼي.
د لاهور محکمې ریکارډ
د لاهور محکمه، چې د پاکستان په نوم د هېواد له جوړیدو هم لسګونه کاله وړاندې موجوده وه او د انګریزي امپراتورۍ تر چتر لاندې یې فعالیت کاوه، په تازه او ریکارډ جوړونکي ګام کې یې خپله یوه تازه پریکړه د انګلیسي پرځای په اردو ژبې صادره کړې ده.
د لاهور محکمې عمر ځینو پاکستاني رسنیو یو نیم سل کاله ښودلی.
که دا ادعا سمه وي، بیا کیدای شي ووایو چې دغه محکمه د پاکستان له عمر څخه هم شا او خوا ۸۰ کاله مشره ده.
پاکستان د شاوخوا اویا کلونو تاریخ لرونکی هېواد ګڼل کیږي.
له هرکلي سره مخ شوې پریکړه
د پاکستان یو شمېر رسنیو او فرهنګي کارپوهانو د ژبې د انتخاب له پلوه د لاهور محکمې د یادې پریکړې هرکلی کړی دی.
دوی هیله مندي ښودلې، چې دغه پریکړه به د اردو ژبې د پياوړتیا لپاره ګټوره ثابته او نورې ادارې به هم د دغې ژبې د رسمي کیدو لپاره هڅو ته تشویقې کړي.
ولې اردو ته پاملرنه؟
پاکستان له محدودو هغو هېوادونو ګڼل کیږي، چې د ملت کیدو لپاره لازم طبیعي او قانع کوونکي دلایل نه لري.
دغه هېواد نه واحده جغرافیه لري، نه واحده ژبه، نه واحد ملت او نه یې د قلمرو په اړه د نظر واحده رایه موجوده ده.
د پاکستان د چارو شنونکي له دغه اړخه د پاکستان پاشلتیا هر وخت ممکنه او اسانه ګڼي او باور لري، چې پکې د قومي تربګنیو او بېلتون غوښتنې تاوده شوي فعالیتونه تر ډېره له همدغې غیر طبیعي جغرافیې او ناواحد ملت څخه سرچینه اخلي.
شنونکي باوري دي، چې اردو ژبې ته د پاملرنې له هڅو د پاکستان نیت دا دی، چې په دې ډول ځان د ملي ژبې څښتن او خپل راتلونکي نسلونه د خپل غیر طبیعي جوړښت د منلو او دوام لپاره قانع کړي.
خو دوی دا هم وایي، چې د ورته هڅو کامیابول او ځانته د جعلي هویت او تاریخ جوړول به د پاکستان پوره کیدونکي ارمانونه نه وي.
