افغانستان انتخابات سوله سیاست

د خلیلزاد د تازه مرکې شننه؛ امریکا سوله که ټاکنې غواړي؟

لیکنه: بشر درویش
اعلان

د افغان سولې لپاره د امریکا د بهرنیو چارو وزارت ځانګړي استازي زلمي خلیلزاد له بي بي سي سره په تازه مرکه کې پر ځینو مهمو تودو مسئلو خبرې اترې کړي.

په دې لیکنه کې به د دې مرکې مهم جزیات او شننه وړاندې شي:

مهم ټکي
په دې مرکه کې خلیلزاد دا مهم ټکي بیان کړي:
ـ له افغانستان څخه د امریکایي سرتېرو د وتو موضوع لنډ مهاله نه ده، کلونه وخت به نیسي.

ـ د موقت حکومت مسئله د افغانانو اړوند ده، دوی به خپلو کې پریکړه کوي، چې څنګه له پوځي تقابل پرته ښه او سوکاله راتلونکی ولري.

ـ د ولسمشریزو ټاکنو سرته رسول د ټاکنو د خپلواک کمیسون کار دی، خو ښه به وي چې دا ټاکنې له طالبانو سره د سولې تر توافق وروسته وشي.

ـ د سولې توافق لا یقیني نه دی، غوره به وي چې ټاکنو کمیسون ټاکنو ته خپل چمتووالی ونیسي.

ـ په افغانستان کې د سولې لپاره امریکایي مامور یم، کومه شخصي اجنډا نه لرم.

افغانانو ته ډاډ ګیرنه
په دې مرکه کې خلیلزاد له یوه لوري افغانانو ته ډاډ ورکړ، چې طالبانو سره د امریکا مذاکرات به په دې مانا نه وي، چې سمدستي به دا هېواد طالبانو ته پریښودل کیږي.
له دې مسئلې سره د امریکا ګټې هم تړلې دي، ځکه امریکا په سیمه کې پراخ هدفونه لري او په اسانه به دلته خپل پوځي او سیاسي حضور پای ته ونه رسوي.

د موقت حکومت کنایوي ملاتړ
هغه دغه راز د موقت حکومت په اړه د پردې لاندې یو پيغام درلود او هغه دا چې دی یا د امریکا حکومت داسې حکومت جوړیدل په افغانستان کې نه غواړي، خو که افغانان د داسې حکومت غوښتونکي وي، نو دوی به ورسره موافق وي.
په دې توګه خلیلزاد د دغسې حکومت جوړیدل رد نه کړل.

ولسمشریزې ټاکنې که سوله؟
امریکایي استازي همدا شان د ولسمشریزو ټاکنو په اړه له کړې تبصرې دوه ډوله خبرې وړاندې کړې:
یوه خبره دا ده چې د ولسمشریزو ټاکنو لپاره امریکا لېواله نه ده؛ برعکس دا غواړي چې طالبانو سره تر دغو ټاکنو مخکې سوله وشي او ټاکنې سیاسي بهیر ته د هغوی له راتلو څخه وروسته ترسره شي.

د دې ترڅنګ بل پيغام یې دا و، چې افغان حکومت دې دغو ټاکنو ته تیاری ونیسي، ځکه امکان شته چې د سولې لپاره هوکړه ونه شي او خبره ټاکنو ته لاړه شي.

له دې خبرو داسې وړاندوینه کیدای شي، چې امریکا ولسمشر غني پر ټاکنو بوخت ساتي او د سولې احتمالي توافق، چې په ډېرګومان پایله به یې د ټاکنو پر ځای د موقت حکومت جوړیدل وي، زمینه ورته برابرول غواړي.

دا چې دا وړاندوینې به څومره سمه خیژي، له راتلونکو تازه سیاسي بدلونونو سره به روښانه شي!

د لیکوال/ لیکوالې په اړه

بشر درویش

بشر درویش د یاران د کاري ټیم غړی دی، چې پر بیلابیلو مسلو د یاران لپاره راپورونه او مطالب چمتو کوي