Advertisements
سپورټ فوټبال

د هیواد د خپلواکۍ بیرته اخیستلو په ویاړ د فوټبال ټورنمنټ پيل سو

د کندهار په احمدشاهي فوټبال لوبغالي کي د پنجشنبې په ماښام د ۵۰ آزادو بي لوبډلو ترمنځ د فوټبال سیالۍ پيل سوې، چي موخه ئې ورڅخه د افغانستان د خپلواکۍ بیرته اخیستلو ۱۰۰مي کلیزي سم لمانځل دي.

دا سیالۍ چي د پټۍ په پرېکېدو سره د پنجشنبې په ماښام پيل سوې، پر مهال ئې د کندهار والي حیات الله حیات، د کندهار فوټبال فدراسیون مسئولینو، مدني فعالانو، ځوانانو، لوبغاړو او ګڼ شمېر مینوالو ګډون کړی وو او له ځان سره ئې د هیواد تور، سور او زرغون بیرغونه درلودل.

د ټورنمنټ په پيل کي د کندهار فوټبال فدراسیون د ځوانانو کمېټې مسئول او د میوند اتلانو لوبډلي کفتان فیض محمد فیضي له والي څخه د کندهار د احمدشاهي لوبغالي د څراغونو د جوړېدو او د میوند اتلانو لوبډلي څخه د مالي ملاتړ غوښتنه وکړه.

وروسته والي حیات الله حیات د دې سیالیو پر جوړېدو خوښي وښودله، چي د هیواد د خپلواکۍ بیرته اخیستلو ۱۰۰مي کلیزي په ویاړ لوبغاړي بیلابیلي لوبي ترسره کوي او له ځان سره د هیواد بیرغ رپوي.

کندهار والي د احمدشاهي لوبغالي یو شمیر ستونزو ته په کتو د فوټبال فدراسیون مسؤلینو ته ډاډ ورکړ، چي د حل په موخه به یې ژر اقدام وکړي.

په دې سیالیو کي ګډونوال لوبغاړي هم خوښ دي، چي د کندهار فوټبال فدراسیون له لوري ورته دا ډول رسمي سیالۍ جوړیږي، دوی له مسئولینو څخه د دې لوبو د لا زیاتوالي غوښتنه وکړه.

Advertisements

د لیکوال/ لیکوالې په اړه

محمد صابر حمیدي ، کندهار کې د یاران د کاري ټیم غړی

محمد صابر حمیدي په کندهار کې د یاران د کاري ټیم غړی دی. نوموړی پر دې سربیره د کندهار پوهنتون د ښووني او روزنې پوهنځی د پښتو څانګې د څلورم کال محصل دی او د ” زما“ راډیو خبري برخه کې کار کوي. صابر د فوټبال لوبغاړی دی. یاران ته په سپورټي، ټولنیزو او نورو برخو کې لیکنې او مطالب چمتو کوي. په یاران کې د نوموړي د ټولو لیکنو د بیا خپرولو حق له یاران سره خوندي دی.