راپور: بشر درویش
افغان ولسمشر محمد اشرف غني وايي، په کالیزه کې دې یوه ورځ د ډاکټر په نوم ونومول شي.
نوموړي دا خبرې پرون د افغانستان طبي شورا له لوري د ناروغ د خوندیتوب، د روغتیا او د لوړو زده کړو سیستمونو د پیاوړتیا لپاره د سرچینو او نظرونو د همغږۍ ملي سمپوزیم کې د ګډون پرمهال وکړې.
ولسمشر غني وویل چې د روغتیایي سکتور د کرونا د شهیدانو په ویاړ په کابل کې یادګاري څلي جوړوي.
ښاغلي غني د کار او ټولنیزو چارو وزارت ته لارښوونه وکړه چې په کالیزه کې دې یوه ورځ د ډاکټر د ورځې په نوم ونوموي او همدارنګه یې د افغانستان طبي شورا څخه وغوښتل چې هر کال لس وړ ډاکټران او درې وړ روغتونونه د تقدیرولو لپاره وړاندیزکړي.
هغه زیاته کړه، له دوه نمونوي روغتونونو څخه به د یو مدیریت بهرمېشتو افغان ډاکټرانو او د بل په هیواد کې دننه افغان ډاکټرانو ته وسپارل شي.
سرچینه وايي، د افغانستان د طبي شورا مشرې ډاکټر نسرین اوریاخېل د جمهوررئیس او د هیواد لومړۍ مېرمن له ملاتړ څخه په مننې وویل، د هیواد د طبابت په تاریخ کې د لومړي ځل لپاره د سکتور ټولو ارګانونو په ګډه پر ستونزو او حل لارو بحث وکړ او د دوی دغه اجماع د طبي ټولنې لویه جرګه ده.
