سپورټ کرکټ

هند سره د ویرات کوهلي نشتون او پر پاکستان د وروستیو ماتو فشار

پاکستانیان او هندیان په خپلو کې د کرکټ سیالۍ ته ډیر کله دې یوې لوبې په سترګه نه بلکې د کشمیر پر سره د جګړې په سترګه ګوري.

کله هم چې د دواړو هیوادونو ترمنځ لوبه وي، نو د دواړو هیوادونو په میلونونو عوامو سربېره یې چارواکي هم څاري.

د دواړو هیوادونو ترمنځ اوږدو تاریخي کشمکشونو ددوی ترمنځ د کرکټ سیالي هم جالبه کړې. یو لوری هم د بل په وړاندې د ماتې زغم نه لري.

د ۲۰۱۸ م کال د کرکټ په اسیا جام سیالیو کې نن دواړه هندوستان او پاکستان په سیالۍ کې مخامخ دي، چې ورته بې شمیره د کرکټ مینه وال هم په تمه دي.

ویل کیږي، د پاکستان اوسنی لومړی وزیر او ددې هیواد د کرکټ د ملي لوبډلې پخوانی کپتان عمران خان هم د دغه لوبې د نندارې په موخه لوبغالي ته ورځي.

د نن ورځ سیالۍ کې ښايي د پاکستان لپاره د هندۍ لوبډلې لوبډلمشر ویرات کوهلي نشتون یو زیری وي، خو په وروستیو لوبو کې پاکستان د هندۍ لوبډلې خلاف د پرلپسې لوبو د ماتې له کبله د یو څه فشار لاندې ښکاري.

هندي لوبډلمشر ویرات کوهلي ته د انګلستان سفر وروسته د هندي کرکټ بورډ لخوا ارام ورکړل شوی او په دې سیالیو کې یې ګډون ونکړ، خو په ننۍ لوبه کې به تر ډیره د ویرات کوهلي نشتون د هندۍ لوبډلې لپاره یوه تشه وي.

بلخوا هندي لوبډله داسې مهال د پاکستان خلاف سیالۍ کې مخامخ کیږي، چې بیګا شپه یې د یوې سختې لوبې وروسته هانګ کانګ ته د۲۶ منډو په توپیر سره ماته ورکړه، او د دوبۍ په توده هوا کې پرلپسې دوه لوبې یو څه د ستړیا سبب کیدای شي.

د دواړو کرکټ ملي لوبډلو ترمنځ ننۍ لوبه د افغانستان پر وخت د مازیګر په ۴ بجو سره پیل کیږي او همدا راز د سبا ورځ په سیالۍ کې به افغان لوبډله د بنګله دیش خلاف په خپلې دویمې لوبې کې مخامخ شي.

د لیکوال/ لیکوالې په اړه

احسان الله ساپی