فبروري 24, 2021

پاکستانیان عمران خان ته نوبل جایزه غواړي

نیږدې ۳ سوه زره پاکستانیانو د ډله ییزو لاسلیکونو په کولو سره خپل صدراعظم عمران خان ته د سولې د نوبل جایزې په نومانداتو کې د نوم لیکنې غوښتنه کړې ده.
د هندي پیلوټ خوشې کیدل
دا پاکستانیان د عمران خان په امر د هند د یوې جنګي الوتکې د پیلوټ خوشې کول سولې ته د عمران خان قرباني او لېوالتیا ګڼي.
دوی باور لري، چې د صدراعظم دغه کار یې د هندوستان او پاکستان ترمنځ په سخت کړکېچن پړاو کې د جنګ امکان کمزوری او سوله ییزې فضا ته د ستنیدو چانس پیاوړی کړ.
د منځګړتوب غوښتنې
د عمران خان پلویان دغه راز د ملګرو ملتونو له سرمنشي، د ترکیې له ولسمشر، د امریکا د بهرنیو چارو وزیر او یو شمېر نورو مطرحو بهرنیو مشرانو سره د عمران خان ټلیفوني خبرې او له هند سره یې د پاکستان د منځګړتوب غوښتنه د نوموړي نورې سوله ییزې هڅې یادوي.
د ویلو ده، چې عمران خان له خپل هندي سیال نریندرا مودي سره هم د ټلیفوني خبرو هڅه کړې، چې په وینا یې هغه ورسره نه دی غږیدلی.
د عمران خان پلویانو هغه ته د نوبل جایزې د غوښتو لياره پر ټویټر ټولنیزې شبکې کمپاین پیل کړی.

نیول شوی هندي پیلوټ ابهی ناندان پرون هند ته وسپارل شو

حکومتي کمپاین
د ټولنیزو رسنیو یاد شوی کمپاین تر ډېره حکومتي فرمایش ښکاري.
دلیل یې دا دی، چې له دغه کمپاین سره هم مهاله د پاکستان د اطلاعاتو وزیر فواد چودھري هم پرون شنبه پارلمان ته په همدې اړه یوه طرحه وړاندې کړه.
په طرحه کې له پارلمان څخه غوښتل شوي څو د نوبل جایزې له ورکوونکې ډلې رسما وغواړي چې د ۲۰۲۰ د سولې نړیواله جایزه عمران خان ته ورکړي.
د هند او پاکستان کړکېچ
پاکستان او هند په وروستیو کې له دې کبله کړکېچ سره مخ شول، چې هند په کشمیر کې پر خپلو سرتېرو د ځانمرګي برید پړه پر پاکستان واچوله او د غچ اخیستو لپاره یې په دغه هېواد کې د بریدګرې ترهګرې ډلې پټنځایونه بمبار کړل.
وروسته پاکستان د یوې هندي جنګي الوتکې د نسکورولو او یوه هندي پیلوټ د نیولو خبر ورکړ.
پاکستان د تېرې جمعې په ورځ دغه پیلوټ هند ته وسپاره او ورسره سم یې د سوله غوښتنې شعارونه شروع کړل.
د منافقت نوی انداز
د شنونکو په باور پاکستان په دې ډول نوې لوبه او منافقت کوي څو د نړۍ يام له خپلو ترهګریزو موخو څخه په بل لور واړوي.
پر پاکستان د هند له برید وروسته هیڅ کوم هېواد د پاکستان ننګه ونه کړه او هند ته یې د برید مشروعیت ورکړ.
د امریکا د بهرنیو چارو وزیر خو لا په ډاګه وویل، چې هند پر پاکستان نه، پر ترهګرو برید کړی.
له دې سره پاکستان په نړیواله کچه سخت منزوي شوی او د سوله غوښتنې د هڅو په نوم خپل شرم او بدنامي پټول غواړي.