عمران خان او د پیسو نړیوال صندوق ؛ مخالف ګوندونه عمران په غلامۍ تورنوي

د پاکستان د شړیدلي اقتصاد د رغونې هغه هڅې، چې صدراعظم عمران خان پیل کړي، د مخالفو ګوندونو له سختو اعتراضونو سره مخ دي.
عمران خان، چې اقتصادي ثبات جوړول یې لوی ټاکنیز شعار و، په وروستیو کې د اقتصادي اصلاحاتو په نوم د مالیې د وزیر ترڅنګ د پاکستان د مرکزي بانک ریس له دندې ګوښه کړی.
ناندریزې ټاکنې
د پاکستان صدراعظم د مرکزي بانک ریس په داسې حال کې له دندې ایسته کړ، چې هغه په بهرني سفر و او د پیسو نړیوال صندوق له چارواکو سره یې پاکستان ته د پور اخیستو په تړاو مذاکرات کول.
عمران خان د هغه پر ځای د پیسو نړیوال صندوق یو پخوانی پاکستانی کارکوونکی رضا باقر د نوي ریس په توګه ګومارلی.
عمران خان څه باندې یوه میاشت مخکې د پاکستان د مالیې وزیر اسد عمر هم له دندې ګوښه او پرځای یې د نړیوال بانک یو پاکستانی کارکوونکی ‘عبدالحافظ شیخ’ ګومارلی و.
پاکستان که مستعمره؟
د عمران خان د حکومت مخالفو سیاسي ګوندونو هغه تورن کړی، چې د نړیوالو اقتصادي بنسټونو غلامۍ ته یې مخ اړولی او پاکستان یې د هغوی په مستعمره بدل کړی.
د مسلم لیګ نواز ګوند منشي احسان اقبال وایي دوی به دا موضوع په پارلمان کې تر بحث لاندې ونیسي او عمران خان نه به ځواب وغواړي.
د پیپلز پارټۍ یوه مخکښ خورشید شاه ویلي، چې عمران خان وروستي انفکاکونه او ګومارنې د نړیوالو اقتصادي ادارو په خوښه کړي.
د هغه په وینا عمران خان د اقتصادي ثبات په شعارونو خلک غولولي، خو په عمل کې یې کومه اقتصادي کړنلاره او مثبت کار نه معلومیږي.
د صدراعظم سیاسي مخالفین وایي، هغه له نویو ګومارنو سره د داسې خلکو په لټه دی، چې د پیسو نړیوال صندوق او نړیوال بانک څخه ډېر پورونه ترلاسه او پاکستان په پورونو کې لا نور ډوب کړي.
دوی د دغه وضعیت پر وړاندې د سختو اعتراضونو ګواښ کوي.
د حکومت غبرګون
د عمران خان په مشرۍ د تحریک انصاف ګوند یوه ویاند بیا د مخالفو سیاسي ګوندونو تورونه رد کړي او ویلي، چې دوی عمران خان د خپلو حکومتونو د مرداریو پاکولو ته نه پریږدي.
د هغه په وینا عمران خان که نوي پورونه هم اخلي، د مخکینیو پورونو او بد اقتصاد د ترمیم لپاره یې لګوي او خپله پکې د نورو مطرحو سیاستوالو او پخوانیو چارواکو په شان د فساد خیال نه لري.
پاکستان کې دا ناندرۍ په داسې وخت دي، چې اقتصادي وضعیت یې خراب ګڼل کیږي او حکومت یې له مختلفو هېوادونو څخه د مرستو، پورونو او پانګونو د جذب په لټه کې دی.




وروستي مطالب

شکېب الحسن خپلې غوسې جرمانه کړ

by سمیع الله درانی in سپورټ

  د بنګله‌دېش پیاوړي الراونډر شکېب الحسن د جمعې په ورځ د بنګله‌دېش په داخلي ډیویژن لیګ لوبو کې د اېل بي ډبلیو اپیل څخه وروسته غوسه شو، وېکټې یې لومړی په لغته ووهلې او ... نور ولولئ