د موبایلونو او د اړوندو توکو تولیدوونکو شرکتونو خبر ورکړی، چې افغانستان کې اوس د بې لاینه ګوشکیو یا بې مزو غوږیو بازار په ګرمېدو دی.
دا ګوشکي د ۲۰۱۹ م کال په اکټوبر میاشت کې افغانستان ته هم راغلل او اوس یې خال، خال خلک په غوږونوکې لري.
د کرېک بز وېب پاڼې یو مطلب خپور کړی، په دې مطلب کې راغلي، چې د ایکو بیټ په نامه غوږۍ اوس د کابل ولایت په ټولو بازارونوکې موندل کېږي او خلک یې کولای شي، چې په ۶۹ ډالرو وپېري یا راونیسي.
د ګوشکیو یا غوږیو ځانګړتیاوې
دا غوږۍ له موبایل سره نښلول یا وصل کېږي او لاینونه یا مزي نه لري، د بلوټوت په څېر غوږونو کې اېښودل کېږي او بیا که موبایل لرې هم وي؛ نو اواز پکې ځي راځي.
دا ګوشکي د نورو غوږیو یا هیډفونونو خلاف چارج خوري او د چارج په وسیله کار کوي.
د چارجولو لپاره یې ځانګړې اله یا بېټري ته ورته جوړښت دی، چې هغې کې ګوشکي اېښودل کېږي او بیا چارج اخلي.
بېټرۍ ته ورته ساختمان کې بیا د چارجولو ځای دی، چې چارجر پکې اېښودل کېږي او سم دم لکه د موبایل په څېر چارجېږي.
دا ګوشکي د ټي ډبلیو ایس په نامه یوې کمپنۍ جوړ کړي او د اېپل شرکت د هیډ فونونو پرضد یې بازار ته وړاندې کړي دي.
تولیدوونکې کمپني وایي، دې ګوشکیو کې اواز درست او صفا راوځي او اضافي شور نه پرېږدي، چې غوږونو ته تاوان ورسوي.
