ولسمشر غني او د ناټو سرمنشي سره وغږېدل؛ د وروستۍ پرېکړې هرکلی وشو

د ناټو سرمنشي ینس سټولټنبرګ له ولسمشر غني سره ټیلیفوني خبرې کړې دي.

سټولټنبرګ ویلي، ناټو د ترهګرۍ خلاف جګړه کې د افغان امنیتي ځواکونو د ملاتړ دوام ته ژمنه ده.

نوموړي په ټولو لورو غږ کړی چې د سولې خبرو د تقویت او د سیاسي حل لپاره خپلې هڅې زیاتې کړې.

هیره دې نه وي چې نن افغان حکومت د ناټو د هغې پرېکړې هرکلی کړى چې د افغان امنیتي او دفاعي ځواکونو روزنې، تجهیز او سلا مشوروته به دوام ورکوي او د ځواکونه په وتلو کې بېړه نه کوي.

دغه څرګندونې د ولسمشر د وياند مرستيال دواخان مينه پال په خپله ټويټرپاڼه کې کړې دي.

نوموړى زیاتوي چې حکومت د ناټو د دې پرېکړې هرکلی کوي چې د افغانستان د امنیتي او دفاعي ځواکونو روزنې، تجهیز او سلا مشوروته به دوام ورکوي او د ځواکونو په وتلو کي بېړه نه کوي.

د ناټو د غړو هېوادونو د دفاع وزيرانو دوه ورځنۍ انلاين غونډه تېره ورځ ناوخته له کومې څرګندې پرېکړې پرته پاى ته ورسېده.

د یادونې ده چې د ناټو د دفاع وزیرانو په غونډه کې د ناټو عمومي منشي خبریالانو ته ویلي چې طالبانو تر اوسه د بهرنیو ځواکونو وتلو ته زمینه نه ده برابره کړې.

ینس سټولټنبرګ وایي، دوی په ځلونه ویلي چې د سرتېرو ایستل یې په شرایطو پورې تړلي او تر ټولو مهم شرط بیا دا دی چې طالبان به تاوتریخوالی کموي او د سولې لپاره به معنی لرونکي او پایلې لرونکي مذاکرات کوي.

د هغه په خبره طالبانو تاوتریخوالی نه دی کم کړی، نو دا په دې مانا ده چې د سرتېرو د ایستلو لپاره شرایط نه دي برابر.

هغه یو ځل بیا پر طالبانو غږ کړی چې تاوتریخوالی کم کړي او په رښتینې توګه مذاکراتو ته تیار شي.

Be the first to comment

Leave a Reply

Your email address will not be published.