هغوی چې اندریوډ سیستم لرونکی ځیرک ټیلفون کاروي، د یاران اپ له ګوګل پلی سټور خپلو موبایلونو ته ښکته کولی شي. او هلته په یاران کې خپرې شوې ټولې ګټورې لیکنې هره وخت لوستلی شي.  له دې ځایه یاران اپ خپل موبایل ته ښکته کړئ. د اۍ فون لپاره د یاران اپ ډیر زر خپریږي .
اقتصاد

په تجارت کې وېره او ډار مه کوﺉ!

په سوداګرۍ او تجارت کې له ماتې وېره په خپله د ناکامۍ لامل ګرځي.

وېره ځانباوري او د انسان داخلي زړورتیا له منځه وړي، خو دا په دې معنا نه ده، چې تاسې له ډار او ویرې تېښته وکړﺉ، کوښښ وکړﺉ ځان ورسره ښکېل کړﺉ او د عواملو په درک سره یې مقابله وکړﺉ.

یوڅوک وېریږي، چې که موټر ته کښيني ټکر به یې کړي، خوږ او موټر به خراب شي. داسې کسان موټر نه شي زده کولای. له دې ډلې څخه یو زه هم یم، چې د موټر د ټکر له امله مې لا هم موټر سم نه دی زده کړی. موټر چلولای شم، خو ځان ته موټرچلوونکی نه شم ویلای.

د رېسک او خطر له منلو پرته انسان بریالیتوب ته نه رسیږي.

زه ډېر ځله له خپلو ملګرو اورم، چې وايي، «غواړم د وریژو تجارت پیل کړم، خو…»، « غواړم کور جوړ کړم، خو..»، په خو کې خپله ټوله کاري روحیه له لاسه ورکوي. خو اقتصادي اړخ هم درلودای شي، خو کله، چې د سړي اقتصاد کمزوری وي، بیا دغسې هیله هم نه کوي. زه، چې فکر کوم خو تر ډېره بریده زموږ د داخلي وېرې او ډار د انعکاس کلیمه ده.

د یوه ملګري کیسه درته کوم. د خوراکي توکو ښکلی کاروبار لري، خو په کلیواله اصطلاح زړه یې وړوکی دی. هغه زړه نه شي کولای، چې لاهور ته لاړ شي او څو لارۍ وریژې راوړي. دغه بدمرغه له پولیسو هم وېریږي، چې ویې نه نیسي او په کابل کې شته کاروبار به هم ترې پاتې شي. دې وېرې دی لاهور ته له تګه راګرځولی دی او سوداګري او تجارت یې هم ډېر نه غوړیږي. له ده سره د پولیسو ډار دی، خو که یو ځل زړه وکړي او لاړ شي، فکر نه کوم، چې دغه ډار یې نور پر وړاندې خنډ واقع شي.

ځینې دوستان له دې ویریږي، چې نوي توکي راوړي، په بازار کې به یې څوک ونه پېري. دا سم فکر نه دی، ځکه سوداګر خپل توکي د بازار د اړتیا له مخې واردوي. په ژمي کې خلک تودو جامو ته اړتیا لري. اوس سوداګر دا سنجولای شي، چې څه ډول جامې راوړي، چې مشتریان پرځان ور مات کړي. زه خو، چې فکر کوم په ژمي کې هر ډول نوې جامه خپل پېرونکی پیدا کولای شي. دغسې که بازار ته نور نوي توکي وړاندې کیږي هم، مشتریان موندلای شي. کېدای شي ستاسې نوی توکی ټول بازار په سر واخلي او همدا توکی ستاسې د میلیاردر کېدو لامل شي.

ستاسې پر وړاندې یو څیز خنډ دی او هغه له ناکامۍ نه وېره ده. هغه کسان، چې له ناکامۍ ویریږي، هغوی سر له وخته په ناکامۍ محکوم دي. هغه کارغوښتونکي، چې د نوې دندې لپاره یوه دفتر او ادارې ته د مرکې لپاره ځي، که په سر کې یې وېرې ځای نیولی وي، له مرکې مخکې ناکام دى. هغوی دې د بریالیتوب هیله نه کوي، ځکه دوی په خپل ذهن او دماغو کې ناکامۍ ته ځای ورکړی دی.

زما د خبرو هدف دا نه دی، چې تاسې بیخي وېره مه کوﺉ. په ځینو ځایونو کې ویره په کار ده، خو د وېرې حد مو دومره نه وي، چې تاسې ناکامۍ ته ور ټېل وهي، یا د ځاني دفاع ځواک درنه واخلي. که تاسې د تجارت او کاروبار له پیلولو مخکې د هغه پر بریالیتوب غور وکړﺉ او لازم شرایط ورته برابر کړﺉ، فکر نه کوم، چې له ناکامۍ سره مخ شى، یا وېره او ډار مو له بریالیتوبه را وګرځوي.

ستاسو نظر

خپل نظر مو په تبصره کې ولیکئ

هغوی چې اندریوډ سیستم لرونکی ځیرک ټیلفون کاروي، د یاران اپ له ګوګل پلی سټور خپلو موبایلونو ته ښکته کولی شي. او هلته په یاران کې خپرې شوې ټولې ګټورې لیکنې هره وخت لوستلی شي.  له دې ځایه یاران اپ خپل موبایل ته ښکته کړئ. د اۍ فون لپاره د یاران اپ ډیر زر خپریږي .
/* ]]> */