سپورټ کرکټ

انګلستان د نړۍ لومړۍ نمبر لوبډله ماته کړه

تېره شپه د انګلستان ساوتمټن سیمه کې د روز بول لوبغالی د اسټرالیا او انګلستان کرکټ لوبډلو ترمنځ د لومړۍ شل اوریزې لوبې کوربه و.

په دې لوبغالي د انګلستان کرکټ لوبډلې وکولای شول، چې د شل اوریزو لوبو تر ټولو مخکښه کرکټ لوبډله ماته کړي.

د لوبې ټاس اسټرالیا وګاټه خو د لومړۍ توپوهنې بلنه یې انګلستان ته ورکړه.

دې لوبډلې لپاره که څه هم چټک توپوهونکي جاس بټلر ښه پیل وکړ؛ خو د لوبې په اتم اوورکې د اسټرالیایي اشټن اګر لخوا د بټلر او ټام بنټن وېکټو اخېستلو د انګلستان لوبډلې د چټکو منډو جوړولو مخه ډب کړه.

خو د انګلستان لپاره باتجربه لوبغاړی ډېوېډ مېلن تر وروستیو شېبو د بالرانو په مقاومت کې ودرېد او بالاخره خپلې لوبډلې ته یې ۶۶ قیمتي منډې جوړې کړې.

انګلستان د ۷ لوبغاړو په سوځېدو سره ۱۶۲ منډې وکړې.

د اسټرالیا لپاره د هدف پوره کولو په تکل دوه پخواني او مشر لوبغاړي ډېوېډ وارنر او اېرون فېنچ پیل ته راغلل.

ملګرتیا یې خورا ښه وه؛ خو د وارنر او فېنچ په رخصتېدلو سره د لوبډلې د توپوهنې ستنې ونړېدې.

دې لوبډلې په شل اورونوکې د ۶ وېکټو په نقصان سره د وارنر د ۵۸ منډو او فېنچ د ۴۶ منډو په مرسته ۱۶۲ منډې وکړې.

لوبه انګلستان په دوه منډو وګټله او د لوبې غوره لوبغاړي جایزه ډېوېډ مېلن هسکه کړه.

د انګلستان کرکټ لوبډلې وروستۍ یوولس لوبې

انګلستان د تېرې شپې لوبې په ترسره کولو سره په دې وروستیو کې یوولس شل اوریزې لوبې کړي، چې دې لوبو کې یې ۶ لوبې ګټلي، څلور یې بایللي او یوه لوبه یې له پاکستان سره د اګسټ په ۲۸ مه نېټه د باران له امله بې پایلې شوه.

118729402_3852235874807105_7754385978407751666_o.jpg

د انګلستان کرکټ لوبډله او دویمه شل اوریزه لوبه یې

د سبا د یکشنبې په ورځ د سپټمبر په ۶ مه نېټه انګلستان او اسټرالیا دویمه شل اوریزه لوبه کوي، دا لوبه د افغانستان پر وخت ماښام ۵ بجې او ۴۵ دقیقې پېلېږي.

که انګلستان دا لوبه وګټي د درې شل اوریزو لوبو لړۍ یې په ګټه حسابېږي او له دې سره ښایي د اسټرالیا کرکټ لوبډله له لومړي مقام څخه دویم مقام ته راوغورځوي او د انګلستان لوبډله به په شل اوریزو لوبو درجه بندۍ کې لومړی مقام خپل کړي.

 

 

د لیکوال/ لیکوالې په اړه

سپورټ یاران

دا لیکنه د یاران سپورټ ټیم چمتو کړې

تبصره مو ولیکئ