ده سبز کې د دوه میلیونه نفوس په ظرفیت د کابل نوی ښارجوړیږي

راپور: بشر درویش
ښار جوړولو او ځمکو سرپرست وزیر محمود کرزي د وزارت یو شمېر معینانو سره مل د دغه وزارت د سروې او ښاري برنامه جوړونې انجینیرانو سره په کتنه کې په ده سبز ولسوالي کې د نوي کابل ښار جوړولو طرحې په اړه خبرې اترې وکړې.
یاد وزارت یوه خبرپاڼه کې ویلي؛ د ښار جوړولو او ځمکو سرپرست وزیر وویل:

«د کابل نوي ښار جوړول د ښار جوړولو او ځمکو وزارت تازه او تر ټولو مهم لومړیتوب دی او تر دې وروسته به ډېری تمرکز په ورته چارو وي.»

محمود کرزي یادونه وکړه چې د جمهور رییس لارښوونې سره سم غواړي د کابل نوی ښار په داسې بڼه جوړ کړي چې تر دوه مېلیونه نفوسو ظرفیت ولري.

چارواکو ویلي دا ګام به په اقتصادي برخه کې لویه مرسته وکړي

ښار جوړولو او ځمکو سرپرست وزیر له ټولو اړوندو برخو وغوښتل چې د سروې، ډیزاین، ماسټر پلان او تطبیقي چارو لپاره د تجهیزاتو او دغه راز بشري ظرفیتونو په اړه خپل ټول وړاندیزونه شریک کړي، څو دغه چاره په بریالۍ توګه سر ته ورسیږي.

د سروې پیل

د ښار جوړولو معین روښان ولسمل وايي، د سیمې کروکي موجوده ده او ترڅنګ یې د کومې سروې نتایج چې څو کاله مخکې ترسره شوې وه، وزارت کې شته دي.
ښاغلي ولسمل دغه راز څرګنده کړه چې د سیمې ټوپوګرافي سروې به هم پیل شي.
خبرپاڼه کې زیاته شوې؛ ددې لیدنې په دوام د ښار جوړولو او ځمکو سرپرست وزیر وویل:

«کابل نوی ښار یوه ډېره لویه اقتصادي او ټولنیزه پروژه ده چې تطبیق سره به یې ستره پانګه جذب، د ټولنې د هرې طبقې اقتصاد خاوندان به د کور څښتن شي او سربېره پر دې زرګونه خلکو ته به کاري فرصتونه برابر شي.»

ښاغلي محمود کرزي یو وار بیا ډاډ ورکړ چې له شته امکاناتو څخه په ګټنې دغه لویه پروژه بریالۍ کړي.

لومړي کس و اوسه چې پر دې لیکنه نظر لیکي

نظر مو ولیکئ

ستاسو د ایمیل پته نه خپریږي