د کرکټ بورډ په نوو غړو کې محمدنبي هم شتون لري

لیکنه: محمدصابر حمیدي

افغان کرکټ بورډ پرون پنجشنبه خپل بورډ ته څلور نوي غړي اعلان کړل، چې پکې د ملې لوبډلې تکړه او نامتو لوبغاړی محمدنبي عیسی خېل هم شتون لري.
د افغان کرکټ بورډ له لوري په خپره شوې خبرپاڼه کې راغلي، چې د کرکټ بورډ د رییس فرهان یوسفزي د وړاندیز او د کرکټ بورډ د اعلی سرپرست ولسمشر محمد اشرف غني د تایید په پایله کي څلور غړي لرې او پر ځای یې نور وټاکل شول.
په یادو نوو غړو کې د ښځو چارو اوسنۍ وزیره اغلې حسینه ساپۍ، په ولسي جرګه کې د کندهار استازی روح الله خانزاده، د ولسمشر د لومړي مرستیال ارشد سلاکار هارون میر او د ملي لوبډلې لوبغاړی محمد نبي شامل دي.

یاد څلور غړي د ښار جوړونې او اراضي پخواني وزیر ښاغلي محمد جواد پیکار، د سوداګرۍ وزارت د پخوانۍ معینې اغلې کامله صدیقي، د ټرانسپورټ د پخواني وزیر ښاغلي حمید طهماسي او په پاکستان کې د افغانستان پخواني سفیر ښاغلي عاطف مشعل پر ځای معرفي شوي دي.
د یادولو ده چې د افغانستان کرکټ بورډ په ټوله کې د بورډ نهه غړي لري چې د یادو نوو غړو سربېره پکې د افغانستان کرکټ بورډ عمومي مشر ښاغلی فرهان یوسفزی، په پارلماني چارو کې د دولت وزیر ښاغلی ضیاءالحق امرخېل، د مشرانو جرګې غړې اغلې ګلالۍ نور ساپۍ، د چارو ادارې د فرهنګي چارو پخوانی مرستیال ښاغلی فریدون الهام او ملي سوداګر عبدالرحمن الکوزی شامل دي.

Be the first to comment

Leave a Reply

Your email address will not be published.







وروستي مطالب