افغانستان کرونا

کرونا؛ د ایران سره پر پوله دریو ولایتونو کي بندیزونه پیل سوي

خبریال: فضل الله فضلي

افغان حکومت د کرونا ویروس سره په مبارزه کي د هیواد په مختلفو ولایتونو کي نوي بندیزونه پیل کړي دي.

د ایران سره پر پوله مېشت دریو ولایتونو کي تېره ورځ هرات ولایت قرنطین سو او نن په فراه او نیمروز ولایتونو کي ګرځبندیز اعلان سوئ دئ.

بلخوا په کندهار کي د کندهار والي د خوراکي او روغتیايي توکو پرته د نورو دوکانونو پر خلاصون بندیز ولګوئ.

په دې بندیز کي هوټلونه، مېله ځایونه او ترڅنګ یې د خلګو د ګڼي ګوڼي ځایونه هم شامل دي، چي دا بندیز به د نوي اونۍ له شنبې ورځي څخه پیل سي.

ددې سره په څنګ کي په ننګرهار ولایت کي هم د یو شمېر بندیزونو خبر ورکول سوئ دئ.

د کرونا ویروس سره په مبارزه کي هلمندیانو  هم یو شمېر فعالیتونه پیل کړي دي.

په ټوله کي د هیواد په هغو سیمو کي چي لویه لار پکښي تېره سوې او د نورو هیوادونو سره پر پوله پراته دي، خاص ډول ایران هیواد سره، د کرونا سره په مبارزه کي مختلف فعالیتونه پیل سوي دي.

د عامي روغتیا د معلوماتو پر اساس چي اوس هم په پلازمېنه کابل کي د هیواد د مختلفو ولایتونو څخه سلګونه مشکوک معاینات تر لابراتوار او څېړني لاندي دي.

تېره ورځ پدې هیواد کي د کرونا ویروس ټوله شمېره ۸۴ ته پورته سوه.

پدې شمېر کي ۳ تنه، یو ښځینه او یو نارینه په هرات کي او بل نارینه په بلخ ولایت کي وژل سوي او دوه تنه یو په سمنګان او بل په هرات کي روغ سوي دي.

څو ورځي وړاندي په هرات ولایت کي د کرونا ناروغانو لپاره په ۲۰ ورځو کي د ۱۰۰ بستریز روغتون د جوړېدو خبر ورکول سوئ وو، چي اوس مهال ددې روغتون د جوړېدو چاري رواني دي.

د لیکوال/ لیکوالې په اړه

فضل الله فضلي

په کندهار کي د یاران ویب پاڼي لیکوال او ژورنالیست.
زده کړي: کندهار پوهنتون د ژورنالیزم او عامه اړیکو پوهنځی محصل
رسنیزه دنده: ۹ کاله
نوري دندي: هیواد راډیو تلوېزیون او افغانستان ورزشي خبریالان فدراسیون کي ورزشي خبریال، د یو خصوصي انستیتوت د عامه اړیکو مدیر، د سولي ږغ ټولني ولایتي غړی او کندهار پوهنتون پاچاخان علمي څېړنيز مرکز د سولي کلب غړی.

تبصره مو ولیکئ