سپورټ نړیوال کرکټ

په یو ورځنیو لوبو کې کاناډا د زیاتو شپږیزو وهلو ریکارډ ثبت کړ

د چلېنج کپ په نوم یو ورځنۍ سیالۍ د شپږ لوبډلو په شتون کې د پنجشنبې په ورځ په مالیزیا کې پای ته ورسېدې، د دې سیالیو پنځلسمه او وروستۍ لوبه سېنګاپور له کاناډا څخه وګټله، یعنې سېنګاپور د دې سیالیو اتل شو.

دا لوبې د کاناډا، سېنګاپور، قطر، ډېنمارک، مالیزیا او وان واټو لوبډلو ترمنځ د سپټمبر په ۱۶ مه نېټه په کولالمپور کې پیل شوې وې.

د دې سیالیو په اوږدو کې کاناډا تر ټولو ستر هدف مالیزیا ته په څلورمه لوبه کې ورکړې و، کاناډا په پنځوس اورونو کې په ۷ وېکټو ۴۰۸ منډې کړې وې.

توماس ۶۰،  لوبډلمشر دالېوال ۱۴۰ منډې، کومار ۶۰ منډې او روېندر پال سېنګ ۹۴ منډې کړې وې.

شارل فطري بیا د مالیزیا لپاره ۳ وېکټې اخېستې وې.

مالیزیا ۴۶ اعشاریه ۳ اورونوکې د ټولو لوبغاړو په سوځېدو سره ۲۰۲ منډې وکړې او لوبه ترې کاناډا په ۲۰۶ منډو وګټله.

نېتېش کومار د کاناډا لپاره درې وېکټې واخېستې.

کاناډا په دې لوبه کې د نړۍ په کچه په یو ورځنیو لوبوکې د زیاتو شپږیزو وهلو ریکارډ جوړ کړ او د جدول په سرکې یې ځای ونیو، دوی ټولې ۲۸ شپږیزې ووهلې، چې ۴ رودرېګو توماس، ۱۳ ناف نيټ دالېوال، دوه نېتېش کومار او ۹ روېندر پال سېنګ ووهلې، چې ټولې ۲۸ شپږیزې کېږي، تر دې دمه په یو روځنیو لوبو کې د کرکټ په تاریخ کې یوې لوبډلې هم په یوه پاڼۍ کې ۲۸ شپږیزې نه دي وهلي او کاناډا دا ریکارډ خپل کړ.

chal.jpg

 

له ۲۰۱۴ م کال څخه تر ۲۰۱۹ م کال پورې په یوه پاڼۍ کې زیاتې شپږیزې

لومړی کاناډا ۲۸ شپږیزې،  دوهم جمېکا ۲۷ شپږیزې، دریم ویسټرن اسټرالیا ۲۷ شپږیز او څلورم وېسټرن ډېسټرېکټ ۲۶ شپږیزې.

د لیکوال/ لیکوالې په اړه

سمیع الله درانی